Қашқадарё вилояти Китоб тумани ҳокими Алишер Зокиров электр энергияси таъминотида муаммоларга дуч келаётган туман аҳолисига мурожаат қилиб, ҳокимлик биносида ҳам чироқ йўқлигини билдирди.
Ҳоким аҳолининг электр энергияси таъминотидаги узилишлар ортидан қилинган кўплаб сўровларига жавоб бериб, чироқ кўп ўчирилаётганига сўнгги кунларда ҳавонинг кескин совиб кетишини сабаб қилиб кўрсатган. Шунингдек, у электр энергияси таъминоти муаммосини ҳал қилиш туман ҳокимлиги имкониятидаги иш эмаслигини, бу учун республика ташкилотларига, Энергетика вазирлигига ва таъминотчи соҳа раҳбариятига талаблар қўйилаётганини маълум қилган.
Алишер Зокиров мурожаатида ўзи ҳам Китоб туманида яшашини ва ҳокимлик биносида ҳам электр энергияси йўқлигини, электр таъминотидаги узилишлардан туман ҳокимлигига ҳеч бир манфаат йўқлигини маълум қилган. Шунингдек, электр таъминотидаги муаммолар ҳукумат даражасида ҳал қилинишига умид билдирган.
Қадрли тумандошлар! Оталар, оналар, опа-сингиллар, ака-укалар! Туманда чироқ бўлмаслигидан туман раҳбарияти учун ҳеч қандай манфаат йўқ. Балки, бир муаммомиз иккита ва ундан кўпга ортади. Биз аҳвол ўнгланиши бўйича ҳаракатимизни бир зум ҳам тўхтатмаймиз. Тез орада ҳукумат даражасида бу ҳолат бартараф этилишига ишонамиз.
Ўйлаймизки, сиз ҳурматли фуқаролар, бу вақтинчалик қийинчилик ҳал этилгунига қадар вазиятни тушунган ҳолатда баҳолаб, ички имкониятлардан борича фойдаланишга ҳаракат қиласиз. Албатта, умид қиламизки, туманимизда ҳам электр таъминоти тез орада изга тушади», – дейди Алишер Зокиров.
Аввалроқ «Қашқадарё ҳудудий электр тармоқлари» Таллимаржон иссиқлик электр станциясидаги ҳар бирининг қуввати 900 МВт бўлган иккита энергоблок тўхтаганлиги сабабли Қашқадарё вилоятининг айрим ҳудудлари қисман, Қамаши, Яккабоғ, Шаҳрисабз тумани, Шаҳрисабз шаҳри, Китоб туманлари эса электр таъминотидан тўлиқ узилганини маълум қилган эди.
Мавзуга доир:
Изоҳ (0)