Diagnovir қурилмаси сўлак таҳлили орқали 10 сонияда SARS-CoV-2 коронавируси билан касалланганлик ташхисини 99 фоиз аниқликда қўяди. Бу ҳақда Анқарадаги Билькент университети матбуот хизматига таяниб, «РБК» хабар берди.
«Кенг фойдаланилаётган ПЗР-тестлардан фарқли ўлароқ, тизим намуналар репликациясига эмас, балки замонавий оптик усуллар ёрдамида вирус бор ёки йўқлигини аниқлашга асосланган. Тизимда оптик ва электрон модуллардан фойдаланилган бўлиб, улар вируснинг борлигини юқори аниқликда аниқлайди… Ушбу тизим мамлакатимиз ва бутун дунёда вирусни аниқлашнинг тезкор ва ишончли усули сифатида кенг фойдаланилади деб ҳисоблаймиз», — дейилади хабарда.
Вирусни аниқлаш технологияси етти ой давомида яратилган бўлиб, у келажакда нафақат SARS-CoV-2 вирусини, балки бошқа патогенларни ҳам аниқлашга қодир бўлади.
Аниқлаш тизими оптик усулларга асосланган, бунинг учун патогенларни аниқловчи махсус чип яратилган. Бемордан олинган намуна махсус эритма билан аралаштирилади ва ҳосил бўлган аралашма патогенни аниқлаш учун чипга томизилади. Биосенсор қурилма вирусни аниқласа, флуоресцент ранг ўзгаради.
Аввалроқ АҚШдаги Жорж Вашингтон университети тадқиқотчилари мобил телефонлар ёрдамида коронавирусни аниқловчи кичик қурилма яратгани, Эронда коронавирусни ярим дақиқада аниқловчи нанотест яратилгани хабар берилган эди.
Изоҳ (0)