Jizzax viloyati Zomin tumanida 2 oylik chaqalog‘ini o‘ldirgan otaga sud hukmi o‘qildi, deya xabar bermoqda viloyat Ichki ishlar boshqarmasi matbuot xizmati.
Ma’lum bo‘lishicha, voqeaga erkakning shar’iy nikohdagi xotini bilan janjallashishi sabab bo‘lgan. 2020-yilning sentabr oyida ayol erining sobiq turmush o‘rtog‘i bilan telefon orqali gaplashayotganidan xabar topgach janjal boshlangan. Shundan so‘ng erkak choynak bilan xotinning boshiga urgan.
Shuningdek, 9-oktabr kuni soat 23:00 da er-xotinning beshikda yotgan chaqalog‘i yig‘lay boshlagan. Er ayolning go‘dakni eplay olmayotganidan jahli chiqib, qizini o‘zi uxlatmoqchi bo‘lgan. Ota beshikdagi yostiqni olib, ayolining yuziga bir necha marta urgan. Bu jarayonda chaqaloqning boshi beshik qirrasiga urilgan. Shuningdek, bolaga boshqa jarohatlar ham yetkazilgan.
Ayol 10-oktabr kuni ertalab ichki ishlar bo‘limiga murojaat qilgan. Qayd etilishicha, 2020-yil 17-avgustda tug‘ilgan chaqaloq shifoxona bo‘limiga yotqizilgan. Ko‘rsatilgan muolajalarga qaramay, chaqaloq vafot etgan.
Sud tibbiy ekspertizasi bolaning o‘limiga bosh miya yopiq jarohatlanishi, ensa suyagining bitishmalaridan ichkariga qarab sinishi, miya to‘qimasi ezilishi, miya to‘qimasiga, bosh miya bo‘shliqlariga qon quyilishi hamda ko‘krak qafasi orqa yuzasi, ikkala son sohasiga ko‘plab qontalashlar sabab bo‘lganligini qayd etgan.
Sud ushbu jinoyat bilan bog‘liq holatlarni inobatga olib, aybdorga 5 yil muddatga ozodlikdan mahrum qilish jazosini tayinlagan.
Avvalroq Andijonda sevgan qizini rashk qilib 30 yoshli erkakni o‘ldirgani aytilgan o‘smir 9 yilga qamalgani, Zarafshonda mast holda 45 yoshli fuqaroni o‘ldirib qo‘ygan shaxs hibsga olingani hamda voyaga yetmagan qizni zo‘rlaganlikda ayblanayotgan Jasur Umirov qamoqqa olingani haqida xabar berilgandi.
Izoh (0)