O‘zbekistonda 4-yanvar kuni elektr energiyasi ta’minotida uzilishlar kuzatilmoqda. Energetika vazirligi yuzaga kelgan muammo soat 23:00 ga qadar bartaraf etilishini ma’lum qildi.
Qayd etilishicha, soat 06:59 da va 10:10 da “Muborak neft va gaz qazib chiqarish boshqarmasi”ga qarashli neft va gaz qazib chiqarish konlarini elektr energiyasi bilan ta’minlab turgan “Neftchi” podstansiyasidan chiquvchi L-Zevarda -1,2 elektr uzatish tarmoqlari rele himoyasidan o‘chgan.
Oqibatda elektr energiyasini ishlab chiqaruvchi issiqlik elektr stansiyalariga yetkazib berilayotgan tabiiy gaz soatiga 140-175 ming metr kubga qisqargan. Buning natijasida elektr energiyasi ta’minotida respublika hududlari bo‘ylab 600-800 MVtgacha cheklovlar kuzatilmoqda.
“Ushbu yuzaga kelgan nosozlik maxsus brigada tomonidan soat 12:15 da bartaraf etilib, Zevarda, Janubiy Kemachi, Janubiy O‘rtabuloq, Dengizkul, Samontepa siquv kompressor stansiyalaridagi gaz haydash agregatlari qayta ishga tushirilmoqda. Natijada magistral gaz quvurlariga yetkazib berilayotgan tabiiy gaz sarfi qayta tiklana boshladi”, deyiladi xabarda.
Vazirlik keltirilgan noqulayliklar uchun iste’molchilardan uzr so‘rab, nosozlik sabablari tegishli mutaxassislar tomonidan aniqlanayotganini bildirgan.
Eslatib o‘tamiz, Energetika vazirligi 2020-yilda elektr energiyasidagi uzilishlar soni va davomiyligi 2019-yilga nisbatan ikki baravar kamayganini ma’lum qilgan edi. Vazirlik 2020—2021-yillar kuz-qish mavsumida Namangan, Andijon va Farg‘ona viloyatlarida gaz hamda elektr ta’minoti hajmi oshirilishini ham e’lon qilgandi.
Izoh (0)