O‘zbekistonda 15 yil davomida muqim yashagan, fuqaroligi bo‘lmagan shaxslarga to‘g‘ridan to‘g‘ri fuqarolik berish tartibi joriy qilinadi. Bu haqda Shavkat Mirziyoyev 29-dekabr, seshanba kuni Oliy Majlisga yo‘llagan Murojaatnomasida ma’lum qildi.
2019-yilda respublikaga 1995-yilgacha ko‘chib kelgan 50 ming nafardan ortiq shaxslarga O‘zbekiston fuqaroligi berilgan.
“Kelgusi yilda bu ishlarni davom ettirib, 2005-yilgacha mamlakatimizga kelib, doimiy yashayotgan, fuqaroligi bo‘lmagan shaxslarga ham to‘g‘ridan to‘g‘ri O‘zbekiston fuqaroligini bersak, nima deysizlar?”, — degan Prezident.
Buning natijasida yana 20 ming kishi O‘zbekiston fuqarosi bo‘lish imkoniyatiga ega bo‘ladi.
Eslatib o‘tamiz, O‘zbekiston Prezidenti Shavkat Mirziyoyev 2020-yilning mart oyida “O‘zbekiston Respublikasining fuqaroligi to‘g‘risida”gi qonunni imzolagandi. Qonunga muvofiq, 1995-yil 1-yanvarga qadar O‘zbekiston hududiga kirib kelgan va doimiy propiskadan o‘tgan, chet davlat fuqaroligini qabul qilmagan hamda mazkur qonun kuchga kirguniga qadar fuqaroligi bo‘lmagan shaxs O‘zbekiston fuqarosi deb tan olinadi.
Izoh (0)