Ўзбекистонда 15 йил давомида муқим яшаган, фуқаролиги бўлмаган шахсларга тўғридан-тўғри фуқаролик бериш тартиби жорий қилинади. Бу ҳақда Шавкат Мирзиёев 29 декабрь, сешанба куни Олий Мажлисга йўллаган Мурожаатномасида маълум қилди.
2019 йилда республикага 1995 йилгача кўчиб келган 50 минг нафардан ортиқ шахсларга Ўзбекистон фуқаролиги берилган.
«Келгуси йилда бу ишларни давом эттириб, 2005 йилгача мамлакатимизга келиб, доимий яшаётган, фуқаролиги бўлмаган шахсларга ҳам тўғридан-тўғри Ўзбекистон фуқаролигини берсак, нима дейсизлар?», — деган Президент.
Бунинг натижасида яна 20 минг киши Ўзбекистон фуқароси бўлиш имкониятига эга бўлади.
Эслатиб ўтамиз, Ўзбекистон Президенти Шавкат Мирзиёев 2020 йилнинг март ойида «Ўзбекистон Республикасининг фуқаролиги тўғрисида»ги қонунни имзолаганди. Қонунга мувофиқ, 1995 йил 1 январга қадар Ўзбекистон ҳудудига кириб келган ва доимий пропискадан ўтган, чет давлат фуқаролигини қабул қилмаган ҳамда мазкур қонун кучга киргунига қадар фуқаролиги бўлмаган шахс Ўзбекистон фуқароси деб тан олинади.
Изоҳ (0)