“Korrupsiyaga toqatsizlik hayotimiz bir qismiga aylanishi kerak” — Shavkat Mirziyoyev

Korrupsiyaning har qanday ko‘rinishiga toqatsizlik kundalik hayotimizning ajralmas qismiga aylanishi kerak, dedi Shavkat Mirziyoyev 29-dekabr kuni Oliy Majlisga yo‘llagan Murojaatnomasida.

Uning so‘zlariga ko‘ra, bu illatga qarshi kurashishga barcha davlat organlari, siyosiy partiyalar, jamoat tashkilotlari, ommaviy axborot vositalari, umuman, har bir fuqaro safarbar etilishi zarur.

“Korrupsiya o‘ta og‘ir jinoyat ekani va unga nisbatan murosasiz bo‘lish g‘oyasini farzandlarimizga yoshlik davridan boshlab singdirishimiz, ularga faqat halol mehnat va tadbirkorlik orqali daromad topishni o‘rgatishimiz lozim”, — dedi Prezident.

Shuningdek, barcha davlat organlarida qaror qabul qilish jarayonida oshkoralikni ta’minlash zarurligini ta’kidladi. Shavkat Mirziyoyev fuqarolar joriy yildan boshlab davlat xaridlari to‘g‘risidagi ma’lumotlar bilan tanishish va o‘zlarini qiziqtirgan savollarni ko‘tarish imkoniyatiga ega bo‘lganini eslatib o‘tdi.

Prezident Moliya vazirligiga uch oy muddatda davlat idoralari budjetdan tashqari jamg‘armalarining daromad va xarajatlari, davlat ulushiga ega bo‘lgan tashkilotlar xaridlari, davlat subsidiya va grantlariga oid ma’lumotlarni e’lon qilish amaliyotini yo‘lga qo‘yishni topshirdi.

Davlat rahbari so‘nggi ikki yilda hokimlarning 2,5 mingga yaqin qarori sudlar tomonidan bekor qilinganini, bunga yo bilimsizlik yoki korrupsiya sabab bo‘lganini ta’kidlab o‘tgan. Bundan buyon qaror qabul qilishida ochiqlikni ta’minlash uchun elektron axborot tizimi joriy etilishini bildirgan.

Prezident, shuningdek, Korrupsiyaga qarshi kurashish agentligiga bir oy muddatda ochiq e’lon qilinishi lozim bo‘lgan ma’lumotlar ro‘yxatini kengaytirish bo‘yicha taklif kiritishni topshirdi.

Kadrlarni tanlashda ham eski usullardan voz kechib, ularning intellektual salohiyatini, ma’naviy fazilatlarini baholaydigan ochiq va oshkora tanlov tizimi joriy etiladi.

Bundan avval Shavkat Mirziyoyev Prezident saylovlari xalqaro tamoyillar asosida o‘tkazilishi kerakligini aytgani, o‘tgan to‘rt yil davomida jamiyat oshkoralik va ochiqlik, so‘z erkinligi muhitida yashash va ishlashga asta-sekin o‘rganib borayotganini ta’kidlagani haqida xabar berilgan edi.