O‘zbekistonda 2020-yildagi paxta terimi davrida mehnat qonunchiligi buzilganligi uchun 174 nafar mansabdor shaxsga nisbatan jami 745,7 million so‘m miqdorida ma’muriy jarima tayinlangan. Bu haqda 28-dekabr, dushanba kuni AOKAda o‘tkazilgan brifingda Davlat mehnat inspeksiyasi Bosh davlat mehnat huquq inspektori Gulruh Niyozmetova ma’lum qildi, deb xabar beradi “Kun.uz”.
Ma’lum qilinishicha, 2020-yilda Davlat mehnat inspeksiyasi (DMI) tomonidan fermer xo‘jaliklari va klasterlarda 3048 dan ortiq majburiy mehnatga jalb etish holatini o‘rganish ishlari olib borilgan. O‘rganishlar davomida 96 ming nafardan ortiq terimchi va ishchi xodimlar bilan suhbat o‘tkazilib, mehnat qonunchiligi talablariga rioya etilishi tahlil qilingan.
Natijada majburiy mehnatga yo‘l qo‘yilgan 47 ta holat paxta yig‘im-terimi bilan bog‘liq bo‘lib, shundan 6 ta holat yuzasidan tegishli hujjatlar sudlarga kiritilgan.
“Paxta yig‘im-terimi davrida DMI tomonidan mehnat qonunchiligi buzilgani uchun 174 nafar mansabdor shaxsga jami 745 million 712 ming so‘m miqdorida ma’muriy jarima tayinlandi.
DMIning sayt va Telegram tarmoqlari orqali paxta yig‘im-terimi davrida mehnat huquqi buzilishlariga oid jami 790 ta murojaat kelib tushgan bo‘lib, shundan Call-markazimiz orqali 461 ta, veb-sayt orqali 15 ta, ijtimoiy tarmoqlar orqali 113 ta hamda 201 ta yozma ariza qayd etildi”, — deydi Gulruh Niyozmetova.
Bundan tashqari, brifingda majburiy mehnatga eng ko‘p yo‘l qo‘ygan viloyat, mehnat qonunchiligi buzilishi bilan bog‘liq holatlar bo‘yicha ham ma’lumot berilgan.
“Aniqlangan majburiy mehnat holatlariga hududlar kesimida qaraydigan bo‘lsak, joriy yilgi paxta mavsumida majburiy mehnatning asosiy qismi Namangan viloyatida kuzatildi. Shuningdek, Jizzax, Toshkent, Surxondaryo, Xorazm, Andijon, Buxoro, Qashqadaryo, Navoiy va Farg‘ona viloyatlarida ham bu kabi holatlar qayd etildi. 2020-yilning joriy davriga qadar DMIning ish yurituviga jami 23 615 ta murojaat kelib tushgan bo‘lsa, shulardan 13 360 tasi qanoatlantirildi. Fuqarolarning buzilgan mehnat huquqlari tiklandi.
Shuningdek, ish haqlarini o‘z vaqtida bermagan, xodimlar uchun zarur sharoitlar yaratmagan hamda tegishli tartibda mehnat shartnomasini tuzmagan 127 nafar mansabdor shaxsga nisbatan ma’muriy jarimalar qo‘llanildi. Blogerlar tomonidan joylarda mehnat qonunchiligi talablariga amal qilmaslik bo‘yicha ijtimoiy tarmoqlarda yoritilgan jami 113 ta xabar zudlik bilan joylarda o‘rganildi. Ulardan 25 tasida keltirilgan vajlar o‘z tasdig‘ini topdi”, — deydi mutaxassis.
Avvalroq Namangan viloyatida majburiy mehnatga yo‘l qo‘ygani uchun Pop tumani hokimi jarimaga tortilgani, Chortoq va Uchqo‘rg‘on tumanlari hokimlariga hayfsan berilgani haqida xabar berilgan edi. Senat raisi Tanzila Norboyevaning ta’kidlashicha, Namanganda majburiy mehnat bo‘yicha 2013-yildan beri “gard” ham chiqmagan edi.
Izoh (0)