«Коррупцияга тоқатсизлик ҳаётимиз бир қисмига айланиши керак» — Шавкат Мирзиёев

Коррупциянинг ҳар қандай кўринишига тоқатсизлик кундалик ҳаётимизнинг ажралмас қисмига айланиши керак, деди Шавкат Мирзиёев 29 декабрь куни Олий Мажлисга йўллаган Мурожаатномасида.

Унинг сўзларига кўра, бу иллатга қарши курашишга барча давлат органлари, сиёсий партиялар, жамоат ташкилотлари, оммавий ахборот воситалари, умуман, ҳар бир фуқаро сафарбар этилиши зарур.

«Коррупция ўта оғир жиноят экани ва унга нисбатан муросасиз бўлиш ғоясини фарзандларимизга ёшлик давридан бошлаб сингдиришимиз, уларга фақат ҳалол меҳнат ва тадбиркорлик орқали даромад топишни ўргатишимиз лозим», — деди Президент.

Шунингдек, барча давлат органларида қарор қабул қилиш жараёнида ошкораликни таъминлаш зарурлигини таъкидлади. Шавкат Мирзиёев фуқаролар жорий йилдан бошлаб давлат харидлари тўғрисидаги маълумотлар билан танишиш ва ўзларини қизиқтирган саволларни кўтариш имкониятига эга бўлганини эслатиб ўтди.

Президент Молия вазирлигига уч ой муддатда давлат идоралари бюджетдан ташқари жамғармаларининг даромад ва харажатлари, давлат улушига эга бўлган ташкилотлар харидлари, давлат субсидия ва грантларига оид маълумотларни эълон қилиш амалиётини йўлга қўйишни топширди.

Давлат раҳбари сўнгги икки йилда ҳокимларнинг 2,5 мингга яқин қарори судлар томонидан бекор қилинганини, бунга ё билимсизлик ёки коррупция сабаб бўлганини таъкидлаб ўтган. Бундан буён қарор қабул қилишида очиқликни таъминлаш учун электрон ахборот тизими жорий этилишини билдирган.

Президент, шунингдек, Коррупцияга қарши курашиш агентлигига бир ой муддатда очиқ эълон қилиниши лозим бўлган маълумотлар рўйхатини кенгайтириш бўйича таклиф киритишни топширди.

Кадрларни танлашда ҳам эски усуллардан воз кечиб, уларнинг интеллектуал салоҳиятини, маънавий фазилатларини баҳолайдиган очиқ ва ошкора танлов тизими жорий этилади.

Бундан аввал Шавкат Мирзиёев Президент сайловлари халқаро тамойиллар асосида ўтказилиши кераклигини айтгани, ўтган тўрт йил давомида жамият ошкоралик ва очиқлик, сўз эркинлиги муҳитида яшаш ва ишлашга аста-секин ўрганиб бораётганини таъкидлагани ҳақида хабар берилган эди.