Forbes Rossiyaning 2020-yilda eng ko‘p boylik orttirgan milliarderlarini e’lon qildi. Reytingda Sulaymon Kerimov boshchilik qilmoqda

Forbes jurnali 2020-yilda boyligi eng ko‘p o‘sgan rossiyalik milliarderlarning reytingini tuzdi, deya xabar qilmoqda Meduza.

Reytingning birinchi o‘rnida senator Sulaymon Kerimov egalladi, u bir yilda 11,5 milliard AQSh dollariga boyigan. Uning boyligi o‘sishiga oltin narxining yil davomida yuqorilashi sabab bo‘ldi. Hozirda Kerimov va uning oilasi boyligi 20,9 milliard AQSh dollarga baholanmoqda.

Ikkinchi o‘rinda “NLMK” hamraisi Vladimir Lisin qayd etildi. Yil davomida uning boyligi po‘lat narxlarining ko‘tarilishi tufayli 5,4 milliard dollarga o‘sib, 26,2 milliard AQSh dollarini tashkil etdi.

Uchinchi o‘rin USM Holdings hammuassisi Alisher Usmonovga nasib etdi. Bir yil ichida u 3,6 milliard AQSh dollariga boyidi va hozir uning boyligi 16,1 milliard dollarga baholanmoqda. Ro‘yxatning boshqa a’zolari singari, Alisher Usmonovga ham metallurgiya mahsulotlarining narxi ko‘tarilishi yordam bergan.

Qayd etilishicha, boyligi 2020-yilda eng ko‘p o‘sgan rus milliarderlari ro‘yxatiga o‘nta tadbirkor kirgan. Bir yil davomida ularning boyliklari jami 33 milliard AQSh dollariga o‘sgan.

Avvalroq Forbes sog‘liqni saqlash sohasida paydo bo‘lgan 50 nafar yangi milliarderni va dunyodagi eng nufuzli ayollar reytingini e’lon qilgani hamda eng serdaromad Youtube blogerlar reytingida yana 9 yoshli bolakay birinchi bo‘lgani haqida xabar berilgandi.