Forbes журнали 2020 йилда бойлиги энг кўп ўсган россиялик миллиардерларнинг рейтингини тузди, дея хабар қилмоқда Meduza.
Рейтингнинг биринчи ўрнида сенатор Сулаймон Керимов эгаллади, у бир йилда 11,5 миллиард АҚШ долларига бойиган. Унинг бойлиги ўсишига олтин нархининг йил давомида юқорилаши сабаб бўлди. Ҳозирда Керимов ва унинг оиласи бойлиги 20,9 миллиард АҚШ долларга баҳоланмоқда.
Иккинчи ўринда «NLMK» ҳамраиси Владимир Лисин қайд этилди. Йил давомида унинг бойлиги пўлат нархларининг кўтарилиши туфайли 5,4 миллиард долларга ўсиб, 26,2 миллиард АҚШ долларини ташкил этди.
Учинчи ўрин USM Holdings ҳаммуассиси Алишер Усмоновга насиб этди. Бир йил ичида у 3,6 миллиард АҚШ долларига бойиди ва ҳозир унинг бойлиги 16,1 миллиард долларга баҳоланмоқда. Рўйхатнинг бошқа аъзолари сингари, Алишер Усмоновга ҳам металлургия маҳсулотларининг нархи кўтарилиши ёрдам берган.
Қайд этилишича, бойлиги 2020 йилда энг кўп ўсган рус миллиардерлари рўйхатига ўнта тадбиркор кирган. Бир йил давомида уларнинг бойликлари жами 33 миллиард АҚШ долларига ўсган.
Аввалроқ Forbes соғлиқни сақлаш соҳасида пайдо бўлган 50 нафар янги миллиардерни ва дунёдаги энг нуфузли аёллар рейтингини эълон қилгани ҳамда энг сердаромад Youtube блогерлар рейтингида яна 9 ёшли болакай биринчи бўлгани ҳақида хабар берилганди.
Изоҳ (0)