28-dekabrdan boshlab Turkiya hududiga aviaparvozlar orqali uchib keladigan yo‘lovchilar koronavirusga topshirgan testining salbiy natijasini taqdim etishi kerak. Bu haqda mamlakat sog‘liqni saqlash vaziri Fahriddin Kojaga tayanib, “RIA Novosti” xabar berdi.
Ushbu qoida 30-dekabrdan boshlab yerusti transportida sayohat qiladigan sayyohlar uchun ham amalda bo‘ladi.
Kojaning so‘zlariga ko‘ra, so‘nggi 72 soat davomidagi koronavirusga testi manfiy natijalari to‘g‘risida ma’lumotnoma taqdim etgan holda mamlakat hududiga kiritiladi. Hujjat yo‘q bo‘lsa, kiritilmaydi.
Avvalroq Turkiya mehmonxonalarida Yangi yil munosabati bilan ko‘ngilochar dasturlarni o‘tkazish taqiqlangan edi.
Eslatib o‘tamiz, 14-dekabr kuni Turkiya prezidenti Rajab Toyyib Erdo‘g‘on Yangi yil bayramlari davrida — 31-dekabr kuni soat 21:00 dan 4-yanvar soat 05:00 ga qadar mamlakatda komendantlik soati amal qilishini e’lon qildi. “Biz avvalroq ko‘rgan chora-tadbirlar sharofati bilan COVID-19’ga aloqador bemorlar va o‘limlar soni boshqa mamlakatlardagiga nisbatan jiddiy ravishda pasayayotganini kuzatyapmiz”, — dedi Erdo‘g‘on.
Izoh (0)