AQSh Kongressi koronavirus tarqalishi fonida iqtisodiyotni qo‘llab-quvvatlashga qaratilgan 892 milliard dollarlik yangi paket loyihasini ma’qulladi, deya xabar bermoqda “RBK” Reuters’ga tayanib.
Shuningdek, Kongress hukumatga 30-sentabrgacha 1,4 trillion dollar miqdorida mablag‘ ajratilishini ma’qullagan.
Yordam choralari dastlab Vakillar palatasi, bir necha soatdan so‘ng Senat tomonidan tasdiqlangan. Bu bir oydan ortiq davom etgan uzoq va qiyin muhokamadan so‘ng kongressmenlar o‘rtasida kelishuv natijasi bo‘ldi.
Vakillar palatasi spikeri Nensi Pelosining ta’kidlashicha, garchi demokratlar talab qilgan mahalliy va davlat organlariga yordamni o‘z ichiga olmagan bo‘lsa ham u yangi paketni ma’qullaydi. Respublikachilar vakili Xel Rojers natijani “haqqoniy murosa” deb atagan.
Paket aksariyat amerikaliklarga 600 dollar miqdorida to‘lovlar, shuningdek, ishsiz qolganlarga haftalik 300 dollar miqdorida qo‘shimcha to‘lovlarni o‘z ichiga olgan.
Hujjatga muvofiq, kichik biznes uchun kreditlar dasturi qariyb 284 milliard dollarga kengaymoqda. Aviakompaniya, maktab, universitet va korxonalarga yordam berish, shuningdek, koronavirusga qarshi vaksinani tarqatish uchun qo‘shimcha mablag‘lar ajratiladi.
Endi yangi iqtisodiy choralarni qo‘llash to‘g‘risidagi farmonni AQShning amaldagi prezidenti Donald Tramp imzolashi kerak.
Eslatib o‘tamiz, mart oxirida AQSh Kongressi Senati COVID-19 koronavirus pandemiyasi sharoitida AQSh kompaniyalari, aholisi va sog‘liqni saqlash tizimini iqtisodiy qo‘llab-quvvatlash chora-tadbirlari to‘g‘risidagi qonun loyihasini bir ovozdan ma’qullab, 2,2 trillion dollar miqdorida mablag‘ ajratgan, ushbu moliyalashtirish paketi mamlakat tarixidagi eng yirigi bo‘lgandi. Aprel oyida esa Kongress iqtisodiyotni qo‘llab-quvvatlashga yana 484 milliard dollar ajratish to‘g‘risidagi dasturni ma’qullagandi. Bahorda tasdiqlangan ko‘plab choralar muddati tez orada tugaydi va yangi chora-tadbirlar paketi ularni uzaytirishni nazarda tutadi.
AQSh koronavirusga chalinganlar soniga ko‘ra dunyoda yetakchilik qilmoqda. Reuters’ning yozishicha, mamlakatda har kuni 200 mingtadan ortiq yangi kasallanish holati qayd etilmoqda. 2o-dekabr kuni 400 mingdan ortiq odamda koronavirus aniqlangandi. Pandemiya boshlanganidan buyon AQShda 18 milliondan ortiq kishida virus aniqlangan, ularning 319 ming nafari vafot etgan.
Avvalroq AQSh Moliya vazirligi iqtisodiyotni kuchaytirishga 916 milliard dollar ajratishni taklif qilgani, mamlakatda shatdaunning oldini olish uchun bir kunga budjet qabul qilingani haqida xabar berilgan edi.
Izoh (0)