O‘zbekiston fuqarolari 2021-yil 1-yanvardan boshlab faqat yangi turdagi xorijga chiqish biometrik pasporti (qizil pasport) bilan O‘zbekiston hududidan chiqishlari mumkinligi belgilangan edi. Bu “zagranpasport” olish istagida bo‘lgan fuqarolar soni keskin ortishiga olib keldi.
Ijtimoiy tarmoqlarda ichki ishlar organlarining, shu jumladan Xorazm viloyatining ayrim shahar va tumanlaridagi IIB Migratsiya va fuqarolikni rasmiylashtirish bo‘limlari oldida odatdagidan ko‘p fuqarolarning yig‘ilganligi va ular navbatga turish tartibiga rioya qilmayotganliklari aks etgan foto va videoxabarlar tarqaldi.
Xorazm viloyati Ichki ishlar boshqarmasining ma’lum qilishicha, 21-dekabr kuni viloyatdagi barcha Migratsiya va fuqarolikni rasmiylashtirish bo‘limlari oldida xorijga chiqish pasportini rasmiylashtirish maqsadida bo‘lgan ko‘plab fuqarolar to‘plangan.
Fuqarolar o‘zaro navbatga turish va karantin tartib-qoidalariga zid ravishda bir joyga to‘planganliklari sababli hududiy ichki ishlar organlari tomonidan tezda elektron navbatlar shakllantirildi va fuqarolarga belgilangan vaqtda yetib kelishlari tushuntirilib, tarqatib yuborilgan.
“Shu o‘rinda fuqarolarimizdan koronavirus infeksiya bilan bog‘liq xavf to‘liq bartaraf etilmaganligini inobatga olib, bir joyda to‘planmasliklarini va navbatda turishda esa o‘zaro hurmat tamoyiliga rioya qilishlarini so‘rab qolamiz”, — deyiladi xabarda.
Izoh (0)