O‘zbekistonda ayollar tadbirkorligini qo‘llab-quvvatlash maqsadida 100 milliard so‘m ajratiladi. Bu haqda 21-dekabr kuni bo‘lib o‘tgan O‘zbekistonda gender tenglikni ta’minlash masalalariga bag‘ishlangan anjumanda Oliy Majlis Senati raisi Tanzila Norboyeva aytib o‘tdi, deya xabar bermoqda “Daryo” muxbiri.
Anjumanda O‘zbekistonda gender tenglikni ta’minlash, xotin-qizlarning ijtimoiy-siyosiy faolligini oshirish, zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish masalalari ko‘rib chiqildi.
Gender tenglikni ta’minlash masalalari bo‘yicha komissiyasi raisi Tanzila Norboyevaning ma’lum qilishicha, “Xalq banki” tizimda ayollar rahbarlik lavozimlarini egallaydi.
“‘Xalq banki’ raisining o‘rinbosari ayol kishi bo‘lsin, deb topshiriq berildi. Undan tashqari, viloyatlardagi ‘Xalq banki’ filiallarida rahbar ayol kishi bo‘lishi mumkin yoki uni o‘rinbosar, albatta, ayol kishi bo‘lishi kerak. Ular aynan ayollar tadbirkorligiga kredit ajratish masalalari bilan shug‘ullandi. Bu uchun maxsus liniya ochilgan – Mahalla va oilani qo‘llab-quvvatlash vazirligi qoshida fondning 100 milliard so‘m mablag‘i shu maqsadlarda ishlatiladi”, – dedi Tanzila Norboyeva.
Ma’lumot uchun, 2020-yilning fevral—mart oylarida Andijon viloyatining Bo‘ston tumanidan tashqari, Sirdaryoning Boyovut, Buxoroning Olot, Qashqadaryoning Qarshi, Namanganning To‘raqo‘rg‘on tumanlariga va Samarqand viloyatining Kattaqo‘rg‘on shahriga ayol-hokimlar tayinlangan edi.
“Ishonaman, ayollar rahbar bo‘lgan tumanlarda adolat bayrog‘i boshqacha hilpiraydi. Biz hokimlikka saylangan rahbar ayollarimizga doim yordam beramiz, yelkadosh bo‘lamiz. Bundan keyin ham katta-katta tashkilot va kompaniyalar rahbarligiga ayollarni tayinlash tashabbusi davom etadi. Biz ularni tayyorlayapmiz. Kimlargadir bu ish yoqmas, lekin menga yoqadi” — degandi Prezident.
Izoh (0)