Respublika idoralararo komissiyasi tomonidan olib borilgan o‘rganishdan keyin o‘z lavozimiga qaytgan Buxoro shahar prokurori Jasur Fozilovga nisbatan hayfsan e’lon qilindi. Bu haqda Bosh prokuratura tomonidan xabar berildi.
Ma’lum qilinishicha, Jasur Fozilovga nisbatan xizmat tekshiruvi yakunlanganligi munosabati bilan bosh prokurorning buyrug‘iga asosan shahar prokurori 2020-yil 19-dekabrdan xizmat vazifalarini bajarishga kirishgan.
“Xizmat tekshiruvida J.Fozilov o‘z xizmat vazifalarini lozim darajada bajarmasdan, mas’uliyatsizlikka yo‘l qo‘yib, o‘zi rahbarlik qilayotgan prokuratura ish yurituvida bo‘lgan jinoyat ishining tergovi ustidan nazoratni ta’minlamaganligi, amaldagi qonunchilik bilan muqobil tekshiruvlar bekor qilingan bo‘lsa-da, jinoyat ishiga aloqasi bo‘lmagan xo‘jalik yurituvchi subyektlar mansabdor shaxslarini tergovga jalb qilib, so‘roq qilish orqali muqobil tekshirish, shuningdek, asossiz ravishda tadbirkorni chaqirtirish va majburiy keltirish haqida qo‘l ostidagi tergovchiga topshiriq berganligi aniqlandi.
Shularga ko‘ra, bosh prokurorning 2020-yil 21-dekabrdagi buyrug‘i bilan Buxoro shahar prokurori J.Fozilovga hayfsan intizomiy jazosi qo‘llanildi”, — deyiladi Bosh prokuratura bayonotida.
Eslatib o‘tamiz, 11-dekabrda Jasur Fozilov Shavkat Mirziyoyev va Prezident administratsiyasi rahbariga videomurojaat yo‘llab, xizmat tekshiruvi aslida bosh prokurorga aloqador bo‘lgan “Mustahkam Qurilish Development” qurilish kompaniyasi vakilini so‘roq qilishga chaqirishi ortidan boshlanganini aytgan edi.
Shundan so‘ng Bosh prokuratura munosabat bildirib, holat va prokurorning vajlari o‘rganib chiqilishi hamda xabar berilishini qayd etgandi. Mazkur holatni o‘rganish maqsadida Respublika idoralararo komissiyasi tuzilib, xizmat tekshiruvi Prezident administratsiyasi boshchiligida o‘tkazilishi ma’lum qilingan edi.
Izoh (0)