Ўзбекистон фуқаролари 2021 йил 1 январдан бошлаб фақат янги турдаги хорижга чиқиш биометрик паспорти (қизил паспорт) билан Ўзбекистон ҳудудидан чиқишлари мумкинлиги белгиланган эди. Бу «загранпаспорт» олиш истагида бўлган фуқаролар сони кескин ортишига олиб келди.

Ижтимоий тармоқларда ички ишлар органларининг, шу жумладан Хоразм вилоятининг айрим шаҳар ва туманларидаги ИИБ Миграция ва фуқароликни расмийлаштириш бўлимлари олдида одатдагидан кўп фуқароларнинг йиғилганлиги ва улар навбатга туриш тартибига риоя қилмаётганликлари акс этган фото ва видеохабарлар тарқалди.

Хоразм вилояти Ички ишлар бошқармасининг маълум қилишича, 21 декабрь куни вилоятдаги барча Миграция ва фуқароликни расмийлаштириш бўлимлари олдида хорижга чиқиш паспортини расмийлаштириш мақсадида бўлган кўплаб фуқаролар тўпланган.

Фуқаролар ўзаро навбатга туриш ва карантин тартиб-қоидаларига зид равишда бир жойга тўпланганликлари сабабли ҳудудий ички ишлар органлари томонидан тезда электрон навбатлар шакллантирилди ва фуқароларга белгиланган вақтда етиб келишлари тушунтирилиб, тарқатиб юборилган.

«Шу ўринда фуқароларимиздан коронавирус инфекция билан боғлиқ хавф тўлиқ бартараф этилмаганлигини инобатга олиб, бир жойда тўпланмасликларини ва навбатда туришда эса ўзаро ҳурмат тамойилига риоя қилишларини сўраб қоламиз», — дейилади хабарда.