Профессионал футбол Лигаси (ПФЛ) бош директори вазифасини бажарувчи Диёр Имомхўжаев Суперлига 2021 йилги мавсумида нечта жамоа иштирок этиши масаласида фикр билдирди.

Суперлигада нечта жамоа иштирок этади? Футбол мухлислари ўртасида шу савол кўтарилишига сабабчи бўлган инсонлар орамизда бор экан, ривожланиш бўлмайди. Қуйидаги фикрларни яхшилаб ўқиб чиқишингизни ва шу савол қийнаётган инсонларга тарқатишингизни сўрайман.

• 28 ноябрь куни ЎФА Ижроқўми йиғилиши бўлиб ўтди ва унда ПФЛ вакилининг Суперлигада 14 та, Про-Лигада 10 та клуб иштирок этиши борасидаги таклифи тасдиқланди. «Арал» клубининг истисно тариқасида Про-Лигада иштирок этишига ҳамма бир овоздан рози бўлди. Йиғилишда ЎФА президенти ва Ижроқўм аъзолари иштирок этди. Кейинчалик ЎФА президентининг топшириғи билан Мурат Камалов ҳамда Дилмурод Набиев билан шахсан суҳбатлашдик. Бу инсонларнинг барчаси Президент ташаббуси тўла қўллаб-қувватланиши ва албатта, ФИФА талаблари ҳурмат қилинишини маълум қилди.
• Норматив-ҳуқуқий ҳужжатлар лойиҳалари муҳокамаси порталига жойлаштирилган материалда Суперлига сўзи аллақачон Про-Лига қилиб ўзгартирилган. Биз ҳеч бўлмаса Суперлига ва Про-Лига ўртасидаги спорт принципларини ҳурмат қилишимиз керак.
• Бугунги воқеалар фонида «Нефтчи» мухлисларида кўплаб саволлар пайдо бўлгани рост. Биз «Нефтчи» клубини ҳурмат қиламиз, унинг шонли тарихи ҳақида яхши тасаввурга эгамиз. Ва умид қиламизки, унинг бугунги мухлислари ҳам Суперлигага мард бўлиб, спорт принципи билан чиқишни афзал билади. Ўз уйида кетма-кет уч ўйинни бой берган клубнинг Суперлигада пайдо бўлиб қолиши ПФЛ олиб борган шунча меҳнатни бир пул қилибгина қолмай, ҳамманинг кулгисига ҳам сабаб бўлади.
• Мозийга қайтиб иш кўрмоқ хайрлидир. 2017 йил «Нефтчи» Олий лигада 15-ўринни эгаллади, аммо Суперлигада олиб қолинди (қайтага «Машъал» Суперлигадан тушириб юборилди). Бугунимиз аниқ кўрсатиб турибдики, бундан «Нефтчи» ҳеч қандай хулоса чиқармаган, ўз меҳнатлари билан элитага қайтган «Машъал» эса бугун ундан яхшироқ ҳолатда. Биз мана шу сабоқни унутмаслигимиз керак.

Ҳа, айтганча, Суперлига иштирокчилари сонининг 16 тага етказилиши борасидаги интрига менга икки йил аввалги ҳолатни эслатяпти. Ўшанда икки клуб сунъий равишда Суперлигага қўшилди. Аммо бу на «Динамо»га фойда келтирди ва на «Сурхон»га. Биз бу каби ишларга тўла қаршимиз. Масаланинг қизиқ тарафи шундаки, ўшанда ҳам миш-мишлар «Сурхон» ортида турган мураббий сабаб болалаганди. Ҳозир ўша мутахассис Фарғонада пайдо бўлиб, ишни яна интригадан бошламоқчи кўринади. Биз Хайрулла Бозоров билан суҳбатда «Нефтчи»ни ривожлантириш масаласини муҳокама қилдик. Мен бу инсонга ишонаман ва умид қиламанки, ҳаммаси табиий жараён билан рўй беради. «Нефтчи»нинг узоқ танаффусдан кейин «Истиқлол»га қайтганиёқ шунинг дебочаси эди. Дисквалификациядан қайтаётганлар эса ақл-ҳушларини йиғиб, ҳалол меҳнат билан «Нефтчи»ни Суперлигага олиб чиқади деб умид билдираман. Буёғига уларга омад тилаймиз.

2021 йилги мавсум Суперлигада 14 та клуб иштирок этади!

Диёр Имомхўжаев, ПФЛ бош директори вазифасини бажарувчи

Аввалроқ Илҳом Мўминжонов янги мавсумдан «Нефтчи» бош мураббийи этиб тайинланиши ҳақида хабарлар тарқалди. Мўминжонов 2019 йилнинг апрелида «Навбаҳор»да бош мураббий бўлган вақтида келишилган ўйинларда иштирок этиш ва ўйин натижасига таъсир ўтказиш учун футболчиларини ўйинни сотишга мажбур қилиш каби бандлар билан айбдор деб топилиб, 5 йил муддатга футболга оид фаолиятдан четлатилганди. Бироқ 2020 йилнинг февралида «Сурхон» клубининг мурожаатига кўра, Этика қўмитаси ишни қайта кўриб чиққан ва дисквалификация муддатини қисқартирганди. Унга кўра, Мўминжонов 2021 йилнинг 1 январидан футболдаги фаолиятини давом эттириши мумкин бўлади.