Ўзбекистонда аёллар тадбиркорлигини қўллаб-қувватлаш мақсадида 100 миллиард сўм ажратилади. Бу ҳақда 21 декабрь куни бўлиб ўтган Ўзбекистонда гендер тенгликни таъминлаш масалаларига бағишланган анжуманда Олий Мажлис Сенати раиси Танзила Норбоева айтиб ўтди, дея хабар бермоқда «Дарё» мухбири.
Анжуманда Ўзбекистонда гендер тенгликни таъминлаш, хотин-қизларнинг ижтимоий-сиёсий фаоллигини ошириш, зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш масалалари кўриб чиқилди.
Гендер тенгликни таъминлаш масалалари бўйича комиссияси раиси Танзила Норбоеванинг маълум қилишича, «Халқ банки» тизимда аёллар раҳбарлик лавозимларини эгаллайди.
«‘Халқ банки’ раисининг ўринбосари аёл киши бўлсин, деб топшириқ берилди. Ундан ташқари, вилоятлардаги ‘Халқ банки’ филиалларида раҳбар аёл киши бўлиши мумкин ёки уни ўринбосар, албатта, аёл киши бўлиши керак. Улар айнан аёллар тадбиркорлигига кредит ажратиш масалалари билан шуғулланди. Бу учун махсус линия очилган – Маҳалла ва оилани қўллаб-қувватлаш вазирлиги қошида фонднинг 100 миллиард сўм маблағи шу мақсадларда ишлатилади», – деди Танзила Норбоева.
Мавзуга доир: Танзила Норбоева: «Хотин-қизлар қўмитасида иш бошлаганимда шаҳар ва туман ҳокимликларида аёлларнинг ўрни йўқ, деб айтишар эди»
Маълумот учун, 2020 йилнинг февраль—март ойларида Андижон вилоятининг Бўстон туманидан ташқари, Сирдарёнинг Боёвут, Бухоронинг Олот, Қашқадарёнинг Қарши, Наманганнинг Тўрақўрғон туманларига ва Самарқанд вилоятининг Каттақўрғон шаҳрига аёл-ҳокимлар тайинланган эди.
«Ишонаман, аёллар раҳбар бўлган туманларда адолат байроғи бошқача ҳилпирайди. Биз ҳокимликка сайланган раҳбар аёлларимизга доим ёрдам берамиз, елкадош бўламиз. Бундан кейин ҳам катта-катта ташкилот ва компаниялар раҳбарлигига аёлларни тайинлаш ташаббуси давом этади. Биз уларни тайёрлаяпмиз. Кимларгадир бу иш ёқмас, лекин менга ёқади» — деганди Президент.
Изоҳ (0)