Koronavirusga qarshi vaksina ishlab chiqish va tarqatish bo‘yicha COVAX xalqaro mexanizmi doirasida qariyb 2 milliard vaksina zaxiraga olindi. “Gazeta.uz”ning yozishicha, bu haqda JSST bayonotida ma’lum qilindi.
Ushbu dastur doirasida ishtirok etayotgan barcha 190 mamlakat, shu qatorda O‘zbekiston ham, 2021-yilning birinchi yarmidayoq vaksina zaxirasidan foydalanish imkoniga ega bo‘ladi.
JSST ta’kidlashicha, donorlarning moliyaviy ko‘magi bilan kam va o‘rta daromadli 92 mamlakatga kamida 1,3 milliard doza taqdim etiladi. Dastlabki partiyalar 2021-yilning birinchi choragida yuborilishi kerak.
Vaksinalarning 2 milliard dozasi farmatsevtika kompaniyalari bilan sotib olish to‘g‘risida oldindan kelishuv tuzish yo‘li bilan rezervga olingan. Xususan, vaksinalarning 170 million dozasi AstraZeneca/Oxford, 500 million dozasi Johnson & Johnson kompaniyalari tomonidan zahiraga kelib tushishi kerak.
Ushbu bitimlar Hindistonning Serum instituti (SII) bilan 200 million doza yetkazib berish bo‘yicha ilgari imzolangan shartnomalarga qo‘shimcha bo‘lib, AstraZeneca/Oksford yoki Novavax kompaniyalaridan vaksinani 900 million dozaga oshirish imkoniyati ham mavjud. Shuningdek, Sanofi/GSK kompaniyasidan vaksina olish bo‘yicha bitim ham imzolangan.
Eslatib o‘tamiz, O‘zbekiston COVAX dasturiga 2020-yilning avgust oyida qo‘shilgandi. Dastur shartlariga ko‘ra, daromad darajasi yuqori bo‘lgan davlatlar vaksinalar xaridi uchun pul to‘laydi va shu tariqa bu sohadagi moliyalashtiriladigan davlatlarga subsidiya beradi. Rejalarga ko‘ra, mazkur mexanizm doirasida 2021-yilning oxiriga qadar butun dunyo bo‘yicha 2 milliard doza vaksina ishlab chiqarilishi va tenglik asosida taqsimlanishi kerak.
Izoh (0)