2016-yildan boshlab “Liverpul”da o‘ynab kelayotgan Sadio Maneninng kambag‘al oilada voyaga yetgani va muntazam ravishda faqirlarga yordam berib kelishi haqida eshitgansiz. Biroq futbol muxlislari hashamatdan voz kechgan Manening qanday hayot kechirishiga qiziqishi ham bor gap. Shunday ekan, quyida Sadioning bugungi kunda qayerda yashashi, qanday mashinalarda yurishi va daromadi haqida ma’lumot berib o‘tamiz.
Qayerda yashaydi?
Mane Liverpul markazidan besh kilometr uzoqlikda joylashgan Allerton shaharchasida istiqomat qiladi. Aytishlaricha, u yashayotgan uy chamasi bundan 100 yillar ilgari qurilgan va uning ichi ham kamtarona bezatilgan. Sadioni esa bu zarracha ham tashvishlantirmaydi va mamnuniyat bilan bunga qanoat qiladi.
Mashinalari
Ortiqcha hashamat va xarajatlardan voz kechganiga qaramay, Manening garajiga faqat havas qilish mumkin. Boisi uning avtoparkidan Bentley Continental (340 ming dollar), Audi RS7 (150 ming dollar) va Range Rover Sport (180 ming yevro) kabi mashhur avtoulovlar o‘rin olgan.
Do‘stlari
Mane juda kamtar va kirishimli emasligi uchun do‘stlarining soni bilan maqtana olmaydi. Shunga qaramay, u “Liverpul” sobiq futbolchisi Daniel Starrij bilan tez til topishib ketgandi. Biroq hujumchi va klub hamkorlikni to‘xtatishga qaror qildi va shu tariqa Mane va Danielning yo‘llari ayro ketdi.
Shuningdek, u Mersisayd klubida Muhammad Saloh bilan o‘zaro do‘stona munosabatlarda.
Futboldan tashqari qiziqishlar
Mane bo‘sh vaqtlarini qaysidir orol yoki tungi klublarda emas, balki Senegaldagi o‘zi voyaga yetgan qishlog‘ida o‘tkazishni xush ko‘radi. “Liverpul” yulduzi u yerda xayriya jamg‘armasiga asos solgan, masjidlarni ta’mirlatgan, maktab va kasalxona qurdirgan. Shuningdek, u “Liverpul” tomonidan tashkil etilgan xayriya aksiyalarida ham faol qatnashib keladi.
Sadioninng o‘zi boyligi va mashhurligi haqida shunday deydi:
“Pullar, OAV xabarlari — bularning hech biri menga ta’sir ko‘rsatmaydi. Albatta, men ham bu muhitning bir qismiman. Biroq bularning barchasiga ehtiyotkor ravishda yondashaman. Ijtimoiy tarmoqlardan o‘zimni uzoq tutishga harakat qilaman. O‘zlikni yo‘qotmaslik uchun tez-tez qishlog‘imga borib turaman. Men yulduz emas, balki futbolchi bo‘lishni chin dildan istagan ehtiyotkor insonman. Ishoning, aldamayapman. Hammani birdek yaxshi ko‘raman, shu bilan birga atrofda bo‘layotgan voqealarga ko‘p e’tibor qaratmayman.
10 ta Ferrari, brilliantli 20 ta soat va 2 ta samolyotni nima qilaman? Bulardan ko‘ra odamlarga yordam berganim afzal. Dalada ishlaganman, och qolganman, yalangoyoq o‘ynaganman, maktabga bormaganman va og‘ir damlarni boshimdan o‘tkazganman. Bugun esa futbol o‘ynab, odamlarga yordam berishga harakat qilyapman.
Maktab, stadion qurdim, qashshoqlarga kiyim, poyabzal, ovqat olib berdim. Bundan tashqari, Senegalning kambag‘al qismida yashovchilarga yordam tariqasida oyiga 70 yevrodan tarqatyapman.
Ehtimol men PlayStation o‘ynashni bilmaydigan yagona professional futbolchi bo‘lsam kerak. Terma jamoa va klubda ko‘p vaqtini kompyuter o‘yinlariga sarflaydigan jamoadoshlarim bor. Biroq men buni hech qachon o‘ynamaganman va bu hech qachon kaminani qiziqtirmagan. Hatto joystiklarni qanday boshqarishni ham bilmayman”.
Daromadi
Ma’lumotlarga ko‘ra Manening “Liverpul”dagi bir haftalik maoshi 150 ming yevroni tashkil qiladi. Bundan tashqari u turli bonuslar orqali ham qo‘shimcha daromad ko‘radi.
Izoh (0)