2016 йилдан бошлаб «Ливерпуль»да ўйнаб келаётган Садио Манениннг камбағал оилада вояга етгани ва мунтазам равишда фақирларга ёрдам бериб келиши ҳақида эшитгансиз. Бироқ футбол мухлислари ҳашаматдан воз кечган Маненинг қандай ҳаёт кечиришига қизиқиши ҳам бор гап. Шундай экан, қуйида Садионинг бугунги кунда қаерда яшаши, қандай машиналарда юриши ва даромади ҳақида маълумот бериб ўтамиз.
Қаерда яшайди?
Мане Ливерпуль марказидан беш километр узоқликда жойлашган Аллертон шаҳарчасида истиқомат қилади. Айтишларича, у яшаётган уй чамаси бундан 100 йиллар илгари қурилган ва унинг ичи ҳам камтарона безатилган. Садиони эса бу заррача ҳам ташвишлантирмайди ва мамнуният билан бунга қаноат қилади.
Машиналари
Ортиқча ҳашамат ва харажатлардан воз кечганига қарамай, Маненинг гаражига фақат ҳавас қилиш мумкин. Боиси унинг автопаркидан Bentley Cоntinental (340 минг доллар), Audi RS7 (150 минг доллар) ва Range Rover Sport (180 минг евро) каби машҳур автоуловлар ўрин олган.
Дўстлари
Мане жуда камтар ва киришимли эмаслиги учун дўстларининг сони билан мақтана олмайди. Шунга қарамай, у «Ливерпуль» собиқ футболчиси Даниэль Старриж билан тез тил топишиб кетганди. Бироқ ҳужумчи ва клуб ҳамкорликни тўхтатишга қарор қилди ва шу тариқа Мане ва Даниэлнинг йўллари айро кетди.
Шунингдек, у Мерсисайд клубида Муҳаммад Салоҳ билан ўзаро дўстона муносабатларда.
Футболдан ташқари қизиқишлар
Мане бўш вақтларини қайсидир орол ёки тунги клубларда эмас, балки Сенегалдаги ўзи вояга етган қишлоғида ўтказишни хуш кўради. «Ливерпуль» юлдузи у ерда хайрия жамғармасига асос солган, масжидларни таъмирлатган, мактаб ва касалхона қурдирган. Шунингдек, у «Ливерпуль» томонидан ташкил этилган хайрия акцияларида ҳам фаол қатнашиб келади.
Садиониннг ўзи бойлиги ва машҳурлиги ҳақида шундай дейди:
«Пуллар, ОАВ хабарлари — буларнинг ҳеч бири менга таъсир кўрсатмайди. Албатта, мен ҳам бу муҳитнинг бир қисмиман. Бироқ буларнинг барчасига эҳтиёткор равишда ёндашаман. Ижтимоий тармоқлардан ўзимни узоқ тутишга ҳаракат қиламан. Ўзликни йўқотмаслик учун тез-тез қишлоғимга бориб тураман. Мен юлдуз эмас, балки футболчи бўлишни чин дилдан истаган эҳтиёткор инсонман. Ишонинг, алдамаяпман. Ҳаммани бирдек яхши кўраман, шу билан бирга атрофда бўлаётган воқеаларга кўп эътибор қаратмайман.
10 та Ferrari, бриллиантли 20 та соат ва 2 та самолётни нима қиламан? Булардан кўра одамларга ёрдам берганим афзал. Далада ишлаганман, оч қолганман, ялангоёқ ўйнаганман, мактабга бормаганман ва оғир дамларни бошимдан ўтказганман. Бугун эса футбол ўйнаб, одамларга ёрдам беришга ҳаракат қиляпман.
Мактаб, стадион қурдим, қашшоқларга кийим, пойабзал, овқат олиб бердим. Бундан ташқари, Сенегалнинг камбағал қисмида яшовчиларга ёрдам тариқасида ойига 70 евродан тарқатяпман.
Эҳтимол мен PlayStation ўйнашни билмайдиган ягона профессионал футболчи бўлсам керак. Терма жамоа ва клубда кўп вақтини компьютер ўйинларига сарфлайдиган жамоадошларим бор. Бироқ мен буни ҳеч қачон ўйнамаганман ва бу ҳеч қачон каминани қизиқтирмаган. Ҳатто жойстикларни қандай бошқаришни ҳам билмайман».
Даромади
Маълумотларга кўра Маненинг «Ливерпуль»даги бир ҳафталик маоши 150 минг еврони ташкил қилади. Бундан ташқари у турли бонуслар орқали ҳам қўшимча даромад кўради.
Изоҳ (0)