“Sreda.uz” nashrining Oktavian Veryakin ismli o‘quvchisi 7-dekabr, dushanba kuni Chirchiq relikt to‘qay o‘rmonida daraxtlar kesilganini ma’lum qildi. U tabiatga zarar yetkazilgan hududni kartada ajratib ko‘rsatgan, deb xabar beradi “Gazeta.uz”.
Siyohrang chiziq bilan ajratilgan qism o‘rmonning 2020-yil bahoridagi holatini ko‘rsatadi, oq esa hozirda qolgan qismi.
Toshkent viloyati Ekologiya va atrof-muhitni himoya qilish boshqarmasi inspektorlari Quyi Chirchiq tumanidagi “Abay” mahallasi hududida joylashgan to‘qayzorga borib, vaziyatni o‘rgangan.
Tekshiruv natijasida aniqlanishicha, daraxtlar qishloq xo‘jaligi xaritasining 34-sonli konturida joylashgan daraxtzorda kesilgan. Jami 52 ta daraxt kesilgan, xususan, 46 ta tol va 6 ta kulrang terak.
O‘zbekiston hukumatining “Davlat o‘rmon fondiga kirmaydigan daraxtlar va butalarning qimmatbaho navlarini saqlashga doir qo‘shimcha chora-tadbirlar to‘g‘risida”gi qaroriga ko‘ra, o‘simlik dunyosiga yetkazilgan zarar 444 million 773 ming so‘mga baholangan.
Davlat ekologiya qo‘mitasi ma’lumotlariga ko‘ra, ayni vaqtda uchastka egalarini va qonunbuzarlarni aniqlash bo‘yicha surishtiruv ishlari olib borilmoqda.
To‘plangan hujjatlar Toshkent tabiatni muhofaza qilish prokuraturasiga taqdim etilishga tayyorlanmoqda.
Avvalroq Toshkentning Gagarin ko‘chasidagi chinor daraxti noqonuniy kesilgani ma’lum bo‘lgandi.
Izoh (0)