«Sreda.uz» нашрининг Октавиан Верякин исмли ўқувчиси 7 декабрь, душанба куни Чирчиқ реликт тўқай ўрмонида дарахтлар кесилганини маълум қилди. У табиатга зарар етказилган ҳудудни картада ажратиб кўрсатган, деб хабар беради «Gazeta.uz».
Сиёҳранг чизиқ билан ажратилган қисм ўрмоннинг 2020 йил баҳоридаги ҳолатини кўрсатади, оқ эса ҳозирда қолган қисми.
Тошкент вилояти Экология ва атроф-муҳитни ҳимоя қилиш бошқармаси инспекторлари Қуйи Чирчиқ туманидаги «Абай» маҳалласи ҳудудида жойлашган тўқайзорга бориб, вазиятни ўрганган.
Текширув натижасида аниқланишича, дарахтлар қишлоқ хўжалиги харитасининг 34-сонли контурида жойлашган дарахтзорда кесилган. Жами 52 та дарахт кесилган, хусусан, 46 та тол ва 6 та кул ранг терак.
Ўзбекистон ҳукуматининг «Давлат ўрмон фондига кирмайдиган дарахтлар ва буталарнинг қимматбаҳо навларини сақлашга доир қўшимча чора-тадбирлар тўғрисида»ги қарорига кўра, ўсимлик дунёсига етказилган зарар 444 миллион 773 минг сўмга баҳоланган.
Давлат экология қўмитаси маълумотларига кўра, айни вақтда участка эгаларини ва қонунбузарларни аниқлаш бўйича суриштирув ишлари олиб борилмоқда.
Тўпланган ҳужжатлар Тошкент табиатни муҳофаза қилиш прокуратурасига тақдим этилишга тайёрланмоқда.
Аввалроқ Тошкентнинг Гагарин кўчасидаги чинор дарахти ноқонуний кесилгани маълум бўлганди.
Изоҳ (0)