O‘tgan 11 oy ichida xorijdan qancha o‘zbekistonlik migrantning jasadi vatanga olib kelingani ma’lum bo‘ldi

Xorijga norasmiy ravishda chiqib ketib, qiyin va xavfli sharoitlarda qolgan o‘zbekistonlik mehnat migrantlariga bevosita yordam ko‘rsatilmoqda. Hatto samolyotda uchib ketishi va 3 oylik yashashi uchun sharoit yaratib berish masalasida ham qonuniy tadbirlar ishlab chiqilgan. Bu haqda 4-dekabr kuni AOKAda o‘tkazilgan matbuot anjumanida so‘z yuritildi, deya xabar bermoqda “Daryo” muxbiri.

Bandlik va mehnat munosabatlari vaziri o‘rinbosari Bahodir Umrzoqovning ta’kidlashicha, o‘tgan ikki yil ichida migrantlarga davlat tomonidan ijtimoiy va moddiy yordam ko‘rsatish tizimi yo‘lga qo‘yilgan.

“Oxirgi ikki yil mobaynida eng muammoli yo‘nalishimiz bo‘lgan mehnat migratsiyasi masalalariga ham katta ahamiyat qaratilib, Prezidentimiz va hukumat rahbari tomonidan bir qancha qaror hamda farmonlar imzolandi. Bu borada mehnat migrantlarining ijtimoiy kafolatlari, mehnat tarzi, ularni o‘qitish va moddiy yordam berish masalalarigacha, hammasi hal etilib, bir qator hujjatlar qabul qilindi. Xorijga norasmiy chiqib ketgan mehnat migrantlarimiz qiyin va xavfli sharoitlarda qolgan paytlarida davlat ularga bevosita yordam bermoqda. Hatto samolyotda uchib ketishi, 3 oylik yashashi uchun sharoit va oziq-ovqat bilan ta’minlab berish masalasida ham qonuniy tadbirlar ishlab chiqildi”, — dedi Umrzoqov.

Uning qo‘shimcha qilishicha, 2020-yilning yanvar—noyabr oylarida xorijdan 211 nafar migrantning jasadi davlat hisobidan olib kelingan.

“Eng og‘iri, mehnat migratsiyasiga ketganlarning halok bo‘lishi yoki jarohat olishidir. Bu bo‘yicha ham davlat tomonidan yordam berish maqsadida mehnat migrantlarini ijtimoiy himoyalash jamg‘armasi tashkil etildi. 2020-yilda chet eldan salkam 211 kishining jasadi davlat hisobidan olib kelinib, janozalari o‘tkazildi. Dafn marosimlari tashkil qilinib, oilalariga moddiy yordam berildi”, — dedi vazir o‘rinbosari.