Samarqand viloyat bolalar ko‘p tarmoqli tibbiyot markazida so‘nggi ikki yilda 700 nafar bola yurak jarrohlik amaliyotini o‘tkazgani uchun nogironlikdan xalos bo‘ldi. Bu haqda “Daryo” muxbiri Farhod Norbo‘tayev xabar berdi.
“Yuragida nuqsoni bo‘lgan bolalar operatsiyagacha nogironlik nafaqasini olgan. Operatsiyadan olti oy o‘tganidan so‘ng ular nogironlikdan chiqarilmoqda. Shunday oilalar borki, ularda ikkita, hatto uchtagacha nogiron bola bor. O‘tkazilgan operatsiyadan so‘ng farzandi sog‘lom insonlar qatoriga qo‘shilayotganligi, oilalarda umid uyg‘otmoqda” , — deydi Samarqand viloyat bolalar ko‘p tarmoqli tibbiyot markazi kardioxirurgiya bo‘limi boshlig‘i Niso Turdiyeva.
Ma’lum bo‘lishicha, mazkur muassasaga oxirgi bir yarim yil ichida Qashqadaryo, Surxondaryo, Jizzax, Andijon, Farg‘ona, Xorazm va Toshkent viloyatlaridan bemorlar kelib davolanmoqda.
Muassasa bosh shifokori Mamatqul Azizovning ta’kidlashicha, muassasada Samarqand viloyatida 0-16 yoshgacha 11121 nafar nogiron bola ro‘yxatga olingan. Kasalliklari bo‘yicha eng ko‘p kontengent bosh miya va nerv sistemasi patologiyalari bilan ro‘yxatda turadi.
“Joriy yilning noyabr oyida markaz mutaxassislari tomonidan viloyatning barcha tumanlaridagi ikki va undan ortiq nogiron farzandlari bor 75 ta oilaning 155 nafar nogiron farzandi uyiga borib ko‘rildi. Ko‘rik davomida bemorlarning tibbiy va sotsial ahvoli o‘rganildi. Davolash va reabilitatsiya qilish bo‘yicha yo‘l xaritasi tuzildi. Reja asosida 155 nafar bolaning 74 nafari chuqurlashtirilgan tibbiy ko‘rikdan o‘tish va reabilitatsiya qilish maqsadida markazimizga yotqizildi”, — deydi Mamatqul Azizov.
3-dekabr — Xalqaro nogironlar kuni munosabati bilan bemorlar uchun markazda bayram tadbiri uyushtirilgan. Tadbirda nogiron bemor bolalar uchun Samarqand viloyati qo‘g‘irchoq teatri aktyorlari va 24-musiqiy maktab o‘quvchilari tomonidan konsert dasturi taqdim etilgan.
Izoh (0)