Moskvada 1990-yilda ishlab chiqarilgan va hozirga qadar 2454 kilometr yo‘l bosgan oq rangli “GAZ-2410” sotuvga qo‘yildi. 30 yillik sedanga bir kishi egalik qilgan bo‘lib, uning narxi 1,3 million rublga (17,7 ming dollar) baholanmoqda. Bu pulga Comfort jamlanmali yangi Kia Cerato xarid qilish mumkin, deb xabar beradi Motor.
“GAZ-2410” modeli Gorkiy avtozavodi konveyridan 1985—1992-yillar oralig‘ida chiqqan. Ushbu davr oralig‘ida 417 mingdan ortiq nusxa ishlab chiqarilgan bo‘lib, ular orasidan sedanlar, universallar, shuningdek, favqulodda va maxsus xizmatlar uchun mo‘ljallangan transport vositalari o‘rin olgan.
Sotuvga qo‘yilgan “Volga” deyarli ideal holatda saqlangan. Mashinaning old chap qismiga yetgan kichkina shikast izi va o‘ng qanotning bo‘yalgani hisobga olinmasa, avtomobilda boshqa biror nuqson yo‘q. “GAZ-2410” saloni yorqin velyur (movut) bilan qoplangan bo‘lib, u ham yaxshi holatda. Bundan tashqari, avtomobil egasi kuzovga korroziyaga qarshi qayta ishlov bergan.
Sotuvchining so‘zlariga ko‘ra, “Volga”ga faqatgina uning otasi egalik qilgan. Erkak avtomobildan yoz oylarida foydalangan xolos. Qolgan vaqtda esa “GAZ-2410” garajda saqlangan. 30 yil davomida mashina 2454 kilometr yo‘l bosgan. Sedanga 100 ot kuchiga ega 2,5 litrli karbyurator dvigatel o‘rnatilgan bo‘lib, u to‘rt pog‘onali mexanik uzatmalar qutisi yordamida ishlaydi.
Mashina egasi vafot etgani sabab uning o‘g‘li “Volga”ni 1,3 million rublga sotishga qaror qilgan. Bu pulga 150 ot kuchiga ega 2,0 litrli benzin dvigatel va avtomat uzatmalar qutisiga ega yangi Kia Cerato xarid qilish mumkin.
Avvalroq KGB xodimlariga tegishli Toyota V6 dvigateli o‘rnatilgan ideal holatdagi “Volga” sotuvga qo‘yilgani to‘g‘risida xabar berilgandi.
Izoh (0)