Farg‘onada yo‘l qoidasini buzgan IIB xodimi jarimaga tortildi
Ijtimoiy tarmoqda “Farg‘onalik okaxonlarimizga bo‘laveradimi?” sarlavhasi ostida xabar tarqalgan. Holat yuzasidan YHXBB ma’lumot berdi.
Qayd etilishicha, 2020-yilning 7-dekabr kuni ijtimoiy tarmoqda “Farg‘onalik okaxonlarimizga bo‘laveradimi?” sarlavhasi ostidagi xabar tarqaldi.
Unda Farg‘ona viloyati IIB jamoat tartibini saqlash boshqarmasiga tegishli bo‘lgan, Nexia rusumli 40 312 VSF davlat raqam belgili maxsus xizmat avtomobili yo‘l harakati qoidalarining 91-bandini buzgan holda 1.4 (To‘xtash taqiqlangan joyni bildiradi. Yakka holda yoki 3.27 To‘xtash taqiqlangan yo‘l belgisi bilan qo‘llaniladi hamda yo‘lning qatnov qismi chetiga yoki yo‘l chetidagi to‘siq ustidan chiziladi) yo‘l yotiq chizig‘i chizilgan joyda to‘xtab turganligi aks etgan.
Mazkur holat o‘rganilgan va davlat raqami 40 312 VSF bo‘lgan Nexia maxsus xizmat avtomobili biriktirilgan Farg‘ona viloyati IIB JTSB haydovchi xodimiga nisbatan belgilangan tartibda chora ko‘rilgan.
Avvalroq Jizzax va Toshkentda yo‘l qoidasini buzgan YPX xodimiga chora ko‘rilgani hamda Sirdaryo YHXBga tegishli 4 oyda 15 marta qoida buzgan avtomobil “kechiktirib bo‘lmaydigan xizmat vazifalarini bajarganligi” sabab jarimalardan ozod etilgani haqida xabar berilgandi.
