Москвада 1990 йилда ишлаб чиқарилган ва ҳозирга қадар 2454 километр йўл босган оқ рангли «ГАЗ-2410» сотувга қўйилди. 30 йиллик седанга бир киши эгалик қилган бўлиб, унинг нархи 1,3 миллион рублга (17,7 минг доллар) баҳоланмоқда. Бу пулга Comfort жамланмали янги Kia Cerato харид қилиш мумкин, деб хабар беради Motor.
«ГАЗ-2410» модели Горкий автозаводи конвейридан 1985—1992 йиллар оралиғида чиққан. Ушбу давр оралиғида 417 мингдан ортиқ нусха ишлаб чиқарилган бўлиб, улар орасидан седанлар, универсаллар, шунингдек, фавқулодда ва махсус хизматлар учун мўлжалланган транспорт воситалари ўрин олган.
Сотувга қўйилган «Волга» деярли идеал ҳолатда сақланган. Машинанинг олд чап қисмига етган кичкина шикаст изи ва ўнг қанотнинг бўялгани ҳисобга олинмаса, автомобилда бошқа бирор нуқсон йўқ. «ГАЗ-2410» салони ёрқин велюр (мовут) билан қопланган бўлиб, у ҳам яхши ҳолатда. Бундан ташқари, автомобиль эгаси кузовга коррозияга қарши қайта ишлов берган.
Сотувчининг сўзларига кўра, «Волга»га фақатгина унинг отаси эгалик қилган. Эркак автомобилдан ёз ойларида фойдаланган холос. Қолган вақтда эса «ГАЗ-2410» гаражда сақланган. 30 йил давомида машина 2454 километр йўл босган. Седанга 100 от кучига эга 2,5 литрли карбюратор двигатель ўрнатилган бўлиб, у тўрт поғонали механик узатмалар қутиси ёрдамида ишлайди.
Машина эгаси вафот этгани сабаб унинг ўғли «Волга»ни 1,3 миллион рублга сотишга қарор қилган. Бу пулга 150 от кучига эга 2,0 литрли бензин двигатель ва автомат узатмалар қутисига эга янги Kia Cerato харид қилиш мумкин.
Аввалроқ КГБ ходимларига тегишли Toyota V6 двигатели ўрнатилган идеал ҳолатдаги «Волга» сотувга қўйилгани тўғрисида хабар берилганди.
Изоҳ (0)