Futbol bo‘yicha Angliya chempionatining 11-turida “Manchester Yunayted” 5-dekabr, shanba kuni “Vest Hem” mehmoni bo‘ldi. Dastlab o‘z darvozasidan to‘p olib chiqqan manchesterliklar yakunda 3:1 hisobida zafar quchdi.
Shu tariqa “Manchester Yunayted” Premyer Liga tarixida hisobda ortda borayotgan uchrashuvlarda 385 ochko to‘plashga muvaffaq bo‘ldi. Bu APL tarixidagi (musobaqaga 1992-yilda asos solingan) eng yaxshi natija hisoblanadi.
“Manchester Yunayted” irodali ochkolar (hisobda ortda borib, yakunda ochkoga ega bo‘lish) qo‘lga kiritish borasida “Tottenhem”ning (383 ochko) rekordini yangiladi. Keyingi o‘rinlarda “Arsenal” (356), “Liverpul” (336) va “Chelsi” (332) jamoalari bormoqda.
Shuningdek, “qizil iblislar” APL doirasida ketma-ket 9 ta safar o‘yinida ikki va undan ortiq gol urgan so‘nggi 19 yil ichidagi ilk jamoaga aylandi. 2001-yilda “Lids” ushbu natijani qayd etgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)