Navoiy viloyati Karmana tumanida yo‘lga yugurib chiqqan itdan avtomobilni olib qochmoqchi bo‘lgan Damas haydovchisi yo‘l-transport hodisasiga uchradi va beton to‘siqqa urildi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, Karmana tumani hududidan o‘tuvchi M-37 avtomobil yo‘lining Karmana—Malikrabot yo‘nalishi bo‘yicha 171-kilometrida Damas avtomashinada harakatlanib kelayotgan haydovchi, 1986-yilda tug‘ilgan, Karmana tumani “Malikrabot” MFYda istiqomat qiluvchi A.B. rul boshqaruvini yo‘qotib, beton to‘siqqa urilgan va yo‘l-transport hodisasini sodir etgan. Oqibatda avtomashina yo‘lovchisi, 1968-yilda tug‘ilgan, Karmana tumani “Do‘rmon” MFYda yashovchi fuqaro S.S. umurtqa suyagi sinish jarohatini olib, shifoxonaga yotqizilgan.
Baxtsiz hodisaning kelib chiqish sabablari o‘rganilganda, haydovchi yo‘lning qatnov qismiga to‘satdan yugurib chiqqan itni urib yubormaslikka harakat qilgani ma’lum bo‘lgan. Haydovchi yuqori tezlikda harakatlanib kelayotganligi bois, boshqaruvni yo‘qotib qo‘yib, yo‘l chetidagi beton to‘siqqa urilgan va ag‘darilgan.
Mazkur holat yuzasidan O‘zbekiston Respublikasi Jinoyat kodeksining 266-moddasi 1-qismi (transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, hozirda dastlabki tergov harakatlari olib borilmoqda.
Mavzuga doir:
- Oqdaryoda tanishining Lacetti’sini olib qochgan mast haydovchi beton to‘siqni buzib o‘tdi
- Toyloqda yuqori tezlikda harakatlangan Nexia haydovchisi rul boshqaruvini yo‘qotib, beton to‘siqqa urildi
- Farg‘onada Spark daraxtga urilishi natijasida haydovchi va yo‘lovchi vafot etdi
- Yunusobodda mast haydovchining boshqaruvidagi Lacetti beton to‘siqqa urilib, tiklab bo‘lmas holatga keldi
Izoh (0)