“O‘chirish ishlarini juda ehtiyotkorlik bilan amalga oshiryapmiz” - “Hududiy elektr tarmoqlari”

Hozirgi vaqtda kuniga 30 mingtadan 50 mingtagacha qarzdor iste’molchilar elektr energiyasidan o‘chirilmoqda. Bu haqda 24- noyabr kuni “Hududiy elektr tarmoqlari” tomonidan o‘tkazilgan matbuot anjumanida ma’lum qilindi.

Elektr energiyasini hisobga olishning avtomatlashtirilgan tizimi (ASKUE)ni joriy etish ishlariga bag‘ishlangan tadbirda “Hududiy elektr tarmoqlari” boshqaruv raisining birinchi o‘rinbosari Jahongir Obidjonovning ta’kidlashicha, ASKUE loyihasining ahamiyatini to‘g‘ri tushunib, qarzini to‘layotgan fuqarolar ko‘pchilikni tashkil etmoqda.

“ASKUEni O‘zbekistonda yo‘lga qo‘yish nima uchun zarur?”, degan turli savollar ko‘pchilikda tug‘ilishi tabiiy. Mazkur tizimning amalga oshirilish jarayoni shaxsan Prezident va hukumat rahbarining nazoratida turibdi. O‘tgan davr mobaynida elektr energiyasidan qarzdorlik yildan-yilga o‘sib kelgan. Qarzdorliklarni o‘z vaqtida undirish uchun yig‘ilishlar o‘tkazilardi, ishchi guruhlari tuzilib, hududlarga yuborilardi. Lekin bu ma’lum darajada o‘zining samarasini bermadi. Oxir-oqibat avtomatlashtirilgan tizimga o‘tishga qaror qilindi.

Hozirda har kuni 30 mingtadan 50 mingtagacha qarzdor iste’molchilarni o‘chiryapmiz. Bu albatta, odamlarning e’tiroziga sabab bo‘lyapti, tushunmovchiliklarni ham keltirib chiqarmoqda. Lekin biz hududlarda bo‘lib, fuqarolar bilan suhbatlashganimizda, aksariyat aholi bu tizimni to‘g‘ri tushunib, qarzlarini to‘layotganiga amin bo‘lyapmiz. Yuqorida aytganimdek, ular orasida e’tiroz bildirayotganlar ham yo‘q emas”, — dedi Obidjonov, deya uning so‘zlarini keltirmoqda “Daryo” muxbiri.

Jahongir Obidjonovning aytishicha, karantin paytida “Hududiy elektr tarmoqlari” o‘zining mijozlarini o‘chirmagan, qarzdorlarga ham elektr energiyasi berib turgan.

“Aprel-sentabr oylarida umuman o‘chirish ishlari amalga oshirilmadi. Chunki karantin vaqtida ko‘pchilik uyda bo‘ldi, tadbirkorlar faoliyat yuritmadi. Biroq sentabrdan boshlab tizimni jadallik bilan joriy qilishga kirishilgandan keyin ulangan hisoblagichlarni o‘chirishni boshladik. Sababi biz yetkazib berilgan elektr energiya mablag‘ini elektr energiya ishlab chiqaruvchilarga to‘lab berishimiz kerak. Agar bunday qilmasak, ular o‘z xarajatlarini bajarolmaydi. Energetika sohasida qariyb 55 ming nafar odam ishlaydi. Xodimlarga oylik berish kerak, ular solig‘ini to‘lashi va investitsiyasini qilishi, ta’mirlash ishlarini amalga oshirishi lozim. Bularning hammasiga mablag‘ talab etiladi. Aholidan sarflangan elektr energiyasi to‘lovini vaqtida undirib, yetkazib berolmasak, yuqoridagi ishlarni qilish juda og‘ir.

Iste’molchilar ASKUE tizimiga asta-sekin o‘rgansin, degan maqsadda hozir ham o‘chirish ishlarini juda ehtiyotkorlik bilan amalga oshiryapmiz. Lekin qarzdorlarni o‘chirish sonlari kundan-kunga ko‘payib boryapti. Shuni alohida ta’kidlash joizki, iste’molchilar o‘zi foydalangan elektr energiya mablag‘ini vaqtida to‘lashi zarur. Bu tizim shundayki, iste’molchi qarzdor bo‘lsa, avtomatik ravishda o‘chiriladi va bu jarayonda inson omili qatnashmaydi”, — dedi “Hududiy elektr tarmoqlari” rasmiysi.