Навоий вилояти Кармана туманида йўлга югуриб чиққан итдан автомобилни олиб қочмоқчи бўлган Damas ҳайдовчиси йўл-транспорт ҳодисасига учради ва бетон тўсиққа урилди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича, Кармана тумани ҳудудидан ўтувчи М-37 автомобиль йўлининг Кармана—Маликработ йўналиши бўйича 171-километрида Damas автомашинада ҳаракатланиб келаётган ҳайдовчи, 1986 йилда туғилган, Кармана тумани «Маликработ» МФЙда истиқомат қилувчи А.Б. рул бошқарувини йўқотиб, бетон тўсиққа урилган ва йўл-транспорт ҳодисасини содир этган. Оқибатда автомашина йўловчиси, 1968 йилда туғилган, Кармана тумани «Дўрмон» МФЙда яшовчи фуқаро С.С. умуртқа суяги синиш жароҳатини олиб, шифохонага ётқизилган.
Бахтсиз ҳодисанинг келиб чиқиш сабаблари ўрганилганда, ҳайдовчи йўлнинг қатнов қисмига тўсатдан югуриб чиққан итни уриб юбормасликка ҳаракат қилгани маълум бўлган. Ҳайдовчи юқори тезликда ҳаракатланиб келаётганлиги боис, бошқарувни йўқотиб қўйиб, йўл четидаги бетон тўсиққа урилган ва ағдарилган.
Мазкур ҳолат юзасидан Ўзбекистон Республикаси Жиноят кодексининг 266-моддаси 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Мавзуга доир:
- Оқдарёда танишининг Lacetti’сини олиб қочган маст ҳайдовчи бетон тўсиқни бузиб ўтди
- Тойлоқда юқори тезликда ҳаракатланган Nexia ҳайдовчиси рул бошқарувини йўқотиб, бетон тўсиққа урилди
- Фарғонада Spark дарахтга урилиши натижасида ҳайдовчи ва йўловчи вафот этди
- Юнусободда маст ҳайдовчининг бошқарувидаги Lacetti бетон тўсиққа урилиб, тиклаб бўлмас ҳолатга келди
Изоҳ (0)