Farg‘onada ikki yashar bolasini 1,5 ming dollarga sotmoqchi bo‘lgan ayol ushlandi

Farg‘ona viloyati Farg‘ona shahrida ikki yoshli farzandini 1500 AQSh dollariga sotmoqchi bo‘lgan ayol qo‘lga olindi, deya xabar bermoqda “Xalq so‘zi Online”.

Ma’lum qilinishicha, Farg‘ona shahrida yashovchi 24 yoshli G.S. ikki yoshli o‘g‘li Sh.T.ni 1500 AQSh dollariga sotishni rejalashtiradi. Shu maqsadda o‘zaro kelishuv asosida bola uchun kelishilgan pulning 500 dollarini olayotgan vaqtda qo‘lga olindi.

Tergovga qadar tekshiruvda aniqlanishicha, hali turmushga chiqmagan ayol fohishalik qilib yurib ushbu bolani tug‘gan. Shu bois bolaning otasi kimligi ham noma’lum.

Ma’lum qilinishicha, 2020-yilning o‘tgan davrida O‘zbekistonda o‘z farzandini sotish bilan bog‘liq 23 ta holat kuzatilgan.

Avvalroq Namanganda turmushga chiqmagan ayol 6 oylik chaqalog‘ini 1,9 million so‘mga sotib yuborgani, Sirdaryoda to‘rt kunlik chaqalog‘ini 20 ming dollarga sotayotgan ayol hamda Xivada 4 oylik qizini 120 mln so‘mga sotmoqchi bo‘lgan ayol qo‘lga olingani haqida xabar berilgan edi.