Hukumatning 27-noyabr kuni qabul qilgan tegishli farmoyishiga ko‘ra, Toshkent shahrida maktabgacha ta’lim tashkiloti pedagog kadrlarini tayyorlash va malakasini oshirish kompleks markazi hamda 500 o‘rinli innovatsion davlat maktabgacha ta’lim tashkiloti quriladi.
O‘zAning xabar berishicha, Maktabgacha ta’lim vazirligi va Koreya xalqaro hamkorlik agentligi (KOICA) o‘rtasida maktabgacha ta’lim tashkilotlari pedagog kadrlarini tayyorlash va malakasini oshirish kompleks markazi hamda Koreya davlatining tajribasiga asoslangan 500 o‘rinli innovatsion davlat maktabgacha ta’lim tashkilotini qurish loyihasini amalga oshirish bo‘yicha kelishuvga erishildi.
Hujjatga ko‘ra, markaz va bog‘cha qurilishi uchun Yakkasaroy tumani O‘qituvchilar ko‘chasi hududidan 1,5 gektar yer maydoni doimiy foydalanish uchun ajratiladi.
2019-yilning noyabrida maktabgacha ta’lim vaziri Agrippina Shin KOICA hamda Koreyaning boshlang‘ich ta’lim sohasidagi yetakchi ekspert va konsultantlari bilan uchrashib, maktabgacha ta’lim tizimini rivojlantirishni davom ettirish bo‘yicha loyihalarni amalga oshirish masalalarini muhokama qilgandi.
O‘sha vaqtda tomonlar O‘zbekistonda maktabgacha ta’limni rivojlantirish, unga innovatsion texnologiyalarni tatbiq etish maqsadida innovatsion MTT hamda Koreyaning ilg‘or tajribasi asosida mutaxassislarni qayta tayyorlovchi innovatsion o‘quv markazi tashkil etish haqida kelishib olgandi.
Ushbu loyiha maktabgacha ta’lim xodimlarining malaka sifatini yaxshilash, ixtisoslashtirilgan soha xodimlarining tajriba va malakasini oshirish shuningdek, sezilarli darajada maktabgacha ta’lim qamrovini kengaytirish imkonini berishi ta’kidlangan.
“Innovatsion maktabgacha ta’lim tashkilotining faoliyati nafaqat maktabgacha ta’lim, balki respublika miqyosidagi o‘rta maxsus va oliy ta’lim sohalari uchun ham mos dasturulamal bo‘ladi”, — degan edi Agrippina Shin.
Izoh (0)