Ҳукуматнинг 27 ноябрь куни қабул қилган тегишли фармойишига кўра, Тошкент шаҳрида мактабгача таълим ташкилоти педагог кадрларини тайёрлаш ва малакасини ошириш комплекс маркази ҳамда 500 ўринли инновацион давлат мактабгача таълим ташкилоти қурилади.
ЎзАнинг хабар беришича, Мактабгача таълим вазирлиги ва Корея халқаро ҳамкорлик агентлиги (KOICA) ўртасида мактабгача таълим ташкилотлари педагог кадрларини тайёрлаш ва малакасини ошириш комплекс маркази ҳамда Корея давлатининг тажрибасига асосланган 500 ўринли инновацион давлат мактабгача таълим ташкилотини қуриш лойиҳасини амалга ошириш бўйича келишувга эришилди.
Ҳужжатга кўра, марказ ва боғча қурилиши учун Яккасарой тумани Ўқитувчилар кўчаси ҳудудидан 1,5 гектар ер майдони доимий фойдаланиш учун ажратилади.
2019 йилнинг ноябрида мактабгача таълим вазири Агриппина Шин KOICA ҳамда Кореянинг бошланғич таълим соҳасидаги етакчи эксперт ва консултантлари билан учрашиб, мактабгача таълим тизимини ривожлантиришни давом эттириш бўйича лойиҳаларни амалга ошириш масалаларини муҳокама қилганди.
Ўша вақтда томонлар Ўзбекистонда мактабгача таълимни ривожлантириш, унга инновацион технологияларни татбиқ этиш мақсадида инновацион МТТ ҳамда Кореянинг илғор тажрибаси асосида мутахассисларни қайта тайёрловчи инновацион ўқув маркази ташкил этиш ҳақида келишиб олганди.
Ушбу лойиҳа мактабгача таълим ходимларининг малака сифатини яхшилаш, ихтисослаштирилган соҳа ходимларининг тажриба ва малакасини ошириш шунингдек, сезиларли даражада мактабгача таълим қамровини кенгайтириш имконини бериши таъкидланган.
«Инновацион мактабгача таълим ташкилотининг фаолияти нафақат мактабгача таълим, балки республика миқёсидаги ўрта махсус ва олий таълим соҳалари учун ҳам мос дастуруламал бўлади», — деган эди Агриппина Шин.
Изоҳ (0)