Jinoyat ishlari bo‘yicha Chirchiq shahar sudida 27-noyabr kuni Toshkent viloyati yuqumli kasalliklar shifoxonasi bosh shifokori Guljahon Yo‘ldosheva va boshqalarga nisbatan sud jarayonlari boshlandi. Bu haqda “Kun.uz” xabar berdi.
Sud ishiga jinoyat ishlari bo‘yicha Chirchiq shahar sudi raisi Sunnatillo Avloqulov raislik qilmoqda. Raislik qiluvchi dastlab jarayon ishtirokchilarini sudlanuvchilar va ularga e’lon qilingan ayblov bilan tanishtirdi.
Mazkur jinoyat ishida viloyat bosh infeksionisti Guljahon Yo‘ldosheva Jinoyat kodeksining 167-moddasi 3-qismi “a” bandi (juda ko‘p miqdordagi mablag‘ni o‘zlashtirish yoki rastrata yo‘li bilan talon-toroj qilish), 209-modda 2-qismi “a” bandi (takroran sodir etilgan mansab soxtakorligi), 25-167-modda 3-qismi “a” bandi, 207-modda 1-qismi (mansabga sovuqqonlik bilan qarash) va 207-modda 3-qismi “a” bandi (odam o‘limiga olib kelgan mansabga sovuqqonlik bilan qarash) bilan ayblanmoqda.
Yana to‘rt nafar shaxsga Jinoyat kodeksining tegishli moddalari bilan ayblov e’lon qilingan. Jumladan, Sherzod Ro‘zimetov va Jahongir Ziyodullayev 116-modda 3-qismi (odam o‘limiga sabab bo‘lgan kasb yuzasidan o‘z vazifalarini lozim darajada bajarmaslik), 228-modda 2-qismi “a”, “b” bandlari (takroran va bir guruh shaxslar tomonidan hujjatlarni qalbakilashtirish) va 228-modda 3-qismi (hujjat qalbakiligini bila turib, undan foydalanish) bilan; Alisher Dadamatov va Jannat Hakimova 167-modda 3-qismi “a” bandi (juda ko‘p miqdordagi mablag‘ni o‘zlashtirish yoki rastrata yo‘li bilan talon-toroj qilish) bilan ayblanmoqda.
Ayblov o‘qib eshittirilgach, yig‘ilganlar sud tarkibi va jarayon ishtirokchilari bilan tanishtirildi. Ayblanuvchilar va ularning advokatlari tomonidan sud tarkibiga nisbatan e’tirozlar bildirilmadi. Protsessual tartib bo‘yicha sudlanuvchilarning shaxsiga aniqlik kiritildi hamda ularning huquq va majburiyatlari tushuntirildi.
Shundan so‘ng sudlanuvchi Guljahon Yo‘ldoshevaning advokati sudga iltimosnoma kiritib, himoyasi ostidagi shaxsga qo‘llanilgan uy qamog‘i ehtiyot chorasini munosib xulq-atvorda bo‘lish tarzidagi ehtiyot chorasiga o‘zgartirish, jinoyat ishi hujjatlari bilan tanishib chiqish, undan nusxalar olish va ayblov xulosasini rus tilida prokuror tomonidan tasdiqlangan holda taqdim etilishini ta’minlashni so‘radi.
Raislik etuvchi iltimosnomaning ehtiyot chorasini o‘zgartirish haqidagi qismi protsessual tartibda ko‘rib chiqilishini, ayblov xulosasini rus tilida taqdim etish masalasida prokurorga xat chiqarilishini, jinoyat ishi hujjatlari bilan tanishib chiqish haqidagi qismi bo‘yicha esa biror bir qarshilik yo‘qligini, istalgan vaqtda ish hujjatlari bilan tanishish mumkinligini ma’lum qildi.
Nashrning yozishicha, sud jarayonlarining dastlabki kuni shu tariqa o‘z ishini yakunladi. Navbatdagi sud majlisi 4-dekabr kuni soat 11:00 ga belgilandi.
Avvalroq Guljahon Yo‘ldoshevaga nisbatan tergov yakunlanib, jinoyat ishi sudga yuborilgani haqida xabar berilgandi.
Eslatib o‘tamiz, koronavirusga chalingan bemor o‘limi va 250 million so‘m budjet mablag‘larini talon-toroj qilganlikda ayblanib, qamoqqa olingan Toshkent viloyati bosh infeksionisti Guljahon Yo‘ldoshevaga nisbatan jinoyat ishi 2020-yil 11-avgustda Chirchiq shahar prokuraturasi tomonidan qo‘zg‘atilgan. 8-sentabrga kelib, ehtiyot chorasi sifatida ayblanuvchi qamoqqa olingan edi.
Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari, xususan, Senat raisi Tanzila Norboyeva, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, gender tenglikni ta’minlash masalalari bo‘yicha komissiya a’zosi Saida Mirziyoyeva mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasi o‘zgartirishga chaqirgan.
Shundan so‘ng Guljahon Yo‘ldosheva 6-oktabr kuni uy qamog‘iga o‘tkazilgandi.
Izoh (0)