Buxoro viloyatida to‘rt yildan buyon sovuq qishda gazsiz yashab kelayotgan nogiron fuqaroga “Daryo” muxbiri aralashuvi bilan bir kunda tabiiy gaz ulab berildi. Bu haqda “Daryo” muxbiri xabar berdi.
Buxoro viloyatining Kogon shahrida yashovchi 72 yoshli fuqaro Naim Saidovdan kelgan murojaatga ko‘ra, “Daryo” muxbiri muammoni o‘rganish uchun kechki payt soat 20:30 da fuqaro xonadonida bo‘ldi.
Ikki yon tomoni begona o‘t-o‘lanlaru xas-hashaklar bilan qoplangan, o‘ydim-chuqur, asfaltlanmagan va ta’mirtalab tor yo‘llar oralab, belgilangan manzilga bordik. Atrofdagi noxush hid dimog‘ni bo‘g‘adi. Xonadonlarga olib boruvchi ko‘chalarda chiroq yo‘q. Zim-ziyo. Avtomashina chiroqlari yordamida hovliga kirdik. “To‘kilib” qolgan xonada to‘rt yildan buyon qish chillasini gazsiz o‘tkazayotgan fuqaro Naim Saidov bir ahvolda yotardi.
Xona sovuq. To‘shaklar namiqqan. Qish kunida ko‘pchilik aholi elektr energiyasi ta’minotidan haddan ziyod foydalanishga majburligi boismi, svet g‘ira-shira yoritadi. Xonaning sovuqligiga yarim soat yoki uzog‘i bilan bir soatcha chidash mumkindir. Lekin ikki yilcha oldin oyog‘i sinib, yurolmaydigan ahvolga kelgan Naim Saidov to‘rt yildan buyon shu ahvolda yashashga majbur.
“Aksiga olib, ko‘zimda ‘katarakta’ va ‘glaukoma’ xastaligi bor. Jismoniy mehnatga layoqatsizman. Qiynalib ketdim. Uyimda tabiiy gaz, gaz plitasi yoki pechka ham, ovqat tayyorlab yoki choy qaynatib ichishga ham sharoit yo‘q. Moddiy imkoniyatim yetarli emasligi sababli kasalxonada davolana olmayman. Sovuqda ko‘zim battar xiralashyapti”, — deydi Naim Saidov.
Fuqaro to‘rt yildan buyon murojaatlarini o‘zgalar orqali turli idora, tashkilotlarga og‘zaki yetkazgan. Lekin og‘zaki murojaatlari qanoatlantirilmagan va natija bo‘lmagan.
2020-yilning 4-avgust kuni esa tanishi orqali Prezident xalq qabulxonasiga murojaat qilib, davolanishi va moddiy yordam puli olish masalasida yordam so‘ragan. Murojaatga Kogon shahar mahalla va oilani qo‘llab-quvvatlash bo‘limi tomonidan javob xati yo‘llangan.Javob xatida “Sizga 2020-yilning 15-avgust kuni Kogon shahar hokimligi tomonidan homiylik xayriyalari yetkazib berilgani va sog‘ligingiz yomonlashgani sababli tibbiyot xodimlari tomonidan tibbiy ko‘rikdan o‘tkazilganingiz ma’lum bo‘ldi. Natijadan norozi bo‘lsangiz, yuqori turuvchi organga yoki sudga murojaat qilish huquqingiz borligini bildiramiz” deyilgan.
Mas’ullar javob xatida murojaatchiga 15-avgust kuni yordam berilganini yozgan bo‘lsa-da, fuqaroga yuborilgan xat 14-avgust kuni yozilgani ma’lum bo‘ldi. Buni Kogon shahar mahalla va oilani qo‘llab-quvvatlash bo‘limi rahbari Musavvira Shaydoyeva esa texnik xato deb izohladi.
“Ushbu fuqaroga 2020-yilning 5-avgust kuni homiylik xayriyalari yetkazib berilgan. Bu borada dalolatnoma ham mavjud. 2020-yilning 14-avgustdagi javob xatida texnik xatoga yo‘l qo‘yilgan”.
Mahtumquli mahalla fuqarolar yig‘ini raisi Mahmud Qodirov esa mazkur mahallada uch oydan buyon ish olib borayotganini, shu davr mobaynida fuqaroga oziq-ovqat yoki pul masalasida umuman ko‘mak berilmaganini, shuningdek, murojaatchi “Temir daftar”ga ham kiritilmaganini bildirdi.
Kogon shahar davlat soliq inspeksiyasi boshlig‘i, to‘rtinchi sektor rahbari Furqat Bobomurodov hududda 12657 nafar aholi 2300 ta xonadonda istiqomat qilishini aytib, fuqaro Naim Saidovdan yozma murojaat tushmaganini ta’kidladi.
“Fuqaroning og‘zaki murojaatini qanoatlantirish uchun ‘Kogontumangaz ta’minoti’ bo‘limiga topshiriq berdim. Fuqaroning yolg‘iz yashashi va nogironligini inobatga olib, barcha kerakli anjomlarni sotib olishga kelishib olgandik. Shunga ko‘ra, masala biroz cho‘zildi”, — dedi Furqat Bobomurodov.
Birozdan so‘ng voqea joyiga yetib kelgan “Kogontumangaz ta’minoti” bo‘limi rahbari Nodir Zokirov esa fuqaro Naim Saidovning yakka yolg‘izligini, nogironligini bilmaganini bildirdi.
“Sovuqqonligim sabab vaqtida kelolmadim. Oldinroq kelganimda, bu masala allaqachon yechim topgan bo‘lardi. Ertaga soat 11:00 gacha qolmay, xonadonga zangori olov kiradi”, — dedi Nodir Zokirov.
“Kogontumangaz ta’minoti” bo‘limi rahbari va’dasini bajarib, ertasiga fuqaro xonadonini tabiiy gaz bilan ta’minladi.
Fuqarolar murojaatiga ko‘ra, navbatdagi manzilimiz tumanning “Sarayon” mahallasi bo‘ldi. Aytilishicha, sarayonliklar uzoq yillardan buyon qish faslida tabiiy gaz ta’minoti yaxshimasligidan shikoyat qilib kelgan. Mahalla raisi O‘ktam Xolov aholi va xonadonlar soni ortgani sabab tabiiy gaz bosimi pasayganini bildirdi.
“Mutasaddilar ham dasturdan chiqib ketolmasligini bildirdi. Gaz trubalarining ulanish nuqtasi sakkiz kilometr olisdagi ‘Konchilar’ qo‘rg‘oniga qadar cho‘zilgan. Yangi trubalar tortish 650 milliondan ortiq mablag‘ talab qilar ekan. Shu bois, sarayonliklarni qiynab kelayotgan suv, svet va tabiiy gaz muammolarini bartaraf etish masalasi 2021-yilgi dasturga kiritilar ekan”, — dedi O‘ktam Xolov.
Ma’lum bo‘lishicha, ushbu mahallada hovli-joylardan tashqari 14 ta ko‘p qavatli uy ham mavjud bo‘lib, “Kogontumangaz ta’minoti” ko‘p qavatli uylarni tabiiy gazdan uzmay, hovli-joylarni suyultirilgan gazga o‘tkazish va 50 tonna ko‘mir tarqatish taklifini bergan. Biroq, buni aholi rad etgan.
Fuqaro Maftuna Rahmonovaning aytishicha, odamlarga har yili qish fasli arafasida ko‘plab va’da beriladi, ammo amalda bajarilmaydi.
“O‘tgan yili viloyatimizga Prezidentimiz kelgan payti qishlog‘imizda tabiiy gaz bosimi ko‘tarildi. Biroq, oradan sanoqli kunlar o‘tmay yana pasaydi. Shu sabab uylarimiz juda sovuq. Gaz bor, liniya bor, ammo ta’minot yo‘q. Elektr energiyasi ta’minotidagi uzilishlarni-ku, gapirmasa ham bo‘ladi. Yetmagandek, ichimlik suvi ham iste’molga yaroqsiz. Jonimizdan o‘tgandan keyin ijtimoiy tarmoqqa murojaat qilishga majbur bo‘ldik”, — deydi Maftuna Rahmonova.
“Daryo” muxbiri bilan suhbatlashgan aholining aytishicha, ular mahallaga besh oy raislik qilgan D.P.ga nosoz trubalarni sozlash, muammolarni bartaraf etish uchun 40 ming so‘mdan 9 million so‘m pul yig‘ib bergan. Biroq muammo o‘z holicha qolib ketgan, aholi pullari esa qaytarilmagan. Tappi yig‘ishga majbur bo‘layotgan aholi esa hamon qiyinchiliklar bilan yashamoqda.
Izoh (0)