Markaziy harbiy okrug qo‘mondonligi va Jizzax viloyati hokimligi hamkorligida “Yangi O‘zbekiston — yangicha dunyoqarash” shiori ostidagi noan’anaviy harbiy vatanparvarlik festivali bo‘lib o‘tdi. Unda sakkiz ming nafar aholi va yoshlar ishtirok etdi. Bu haqda “Daryo”ga Markaziy harbiy okrugi matbuot xizmati ma’lum qildi.
“Forish” tog‘ poligonida o‘tkazilgan festivalning tantanali ochilish marosimida so‘z olganlar mamlakat bo‘ylab o‘tkazilayotgan tadbirlarning mazmun mohiyati hamda harbiy xizmat muqaddas burch, yuksak sharaf ekanini ta’kidlab, yoshlarni Vatan himoyasiga ruhlantiruvchi fikrlar bildirdi.
Viloyat musiqali drama teatri jamoasi hamda harbiylar tomonidan Jaloliddin Manguberdining Chingizxon ustidan qilgan g‘alabasi haqidagi jonli sahna ko‘rinishi namoyish etildi. Jizzax hamda Samarqand garnizoni harbiy orkestrlarining badiiy-musiqiy chiqishlari bo‘lib o‘tdi.
Festival davomida jangovor texnika va qurol-aslahalar, kiyim-kechak, oziq-ovqat mahsulotlari ko‘rgazmasi ham tashkil etildi. Dala o‘quv maydonida vatan himoyachilarining jangovor qurollardan foydalanib nishonlarga qarata aniq va tez o‘t ochish kabi chiqishlari namoyish etildi.
Tadbir davomida milliy kurash, tosh ko‘tarish, arqon tortish, kamondan o‘q otish, qo‘l jangi, bilak kuchini sinash musobaqalari o‘tkazilib, ko‘ngilli va ishqiboz chavandozlar uloq ko‘pkari, ot choptirish o‘yinlarida sovrin uchun kurashdi.
Mudofaaga ko‘maklashuvchi “Vatanparvar” tashkilotining harbiy-sport texnikalari, samo uzra parvoz qilgan samolyotlar, kinologiya va kavaleriya qo‘shinlari chiqish qildi.
Markaziy harbiy okrugi qo‘mondonligi tashabbusi bilan O‘zbekistonda ikkinchi marotaba tog‘ yon bag‘rida ovchilar va harbiylar o‘rtasidagi musobaqa tashkil etildi. Unda ovchilar va harbiylar uzoq masofadagi harakatsiz va harakatdagi nishonlarga ov qurollaridan o‘t ochish bo‘yicha bahslashdi.
Izoh (0)