AQShda koronavirusga qarshi vaksinani yetkazib berish kelasi hafta boshlanishi mumkin. Bu haqda mamlakat prezidenti Donald Tramp chet eldagi Amerika kontingenti bilan videoaloqa orqali muloqot qilish chog‘ida aytib o‘tdi, deb yozadi “RBK”.
Trampning so‘zlariga ko‘ra, birinchi bo‘lib vaksina shoshilinch xizmatlar xodimlariga, tibbiyot xodimlariga va keksa yoshdagi fuqarolarga yetkaziladi.
Ammo prezident gap aynan qaysi dori haqida borayotganiga aniqlik kiritmadi.
AQShda Johnson & Johnson, AstraZeneca, Moderna va Pfizer BioNTech bilan hamkorlikda o‘z vaksinalarini sinovdan o‘tkazmoqda.
Avvalroq AQSh prezidentining vaksina ishlab chiqish bo‘yicha maslahatchisi Monsef Slaui AQSh aholisini koronavirusga qarshi emlash kampaniyasi 11-dekabrda boshlanishi mumkinligini aytgan edi. Uning aytishicha, Pfizer kompaniyasi Oziq-ovqatlar va dorilar sifati ustidan sanitar nazorat boshqarmasi (FDA)da o‘z vaksinasidan favqulodda vaziyatlarda foydalanish uchun ro‘yxatdan o‘tkazishga ariza berdi. Shu masala yuzasidan yig‘ilish 10-dekabrga belgilangan.
AQShning Pfizer kompaniyasi Germaniyaning BioNTech kompaniyasi bilan birgalikda ishlab chiqarilgan COVID-19’ga qarshi vaksinaning samaradorligi 95 foizni tashkil etishini ma’lum qildi. Kompaniya ma’lumotlariga ko‘ra, vaksina sinovda qatnashayotgan kishining yoshi, irqi va millatidan qat’i nazar, samarali bo‘lgan. Dastlabki sinov natijalari 90 foiz samaradorlikni ko‘rsatgandi.
Shuningdek, noyabr oyida Amerikaning Moderna kompaniyasi o‘zining yangi koronavirusga qarshi vaksinasi sinovlarning uchinchi bosqichida 94,5 foiz samaradorlik ko‘rsatgani haqida xabar berdi. Rossiyaning “Sputnik V” vaksinasini ishlab chiqaruvchilar esa o‘zlarining vaksinasi samaradorligini 92 foizga baholadi.
Izoh (0)