Parij o‘z-o‘zini respublika deb e’lon qilgan Tog‘li Qorabog‘ni tan olmaydi. Bu haqda Fransiya tashqi ishlar vazirligi 26-noyabr kungi birifingda e‘lon qilgan bayonotda aytiladi, deb yozadi “TASS”.
“25-noyabr kuni Senat rezolyutsiya qabul qildi, u Fransiya hukumatini Tog‘li Qorabog‘ Respublikasini tan olishga chaqiradi. Ovoz berishdan oldin bo‘lib o‘tgan munozaralarda TIV huzuridagi davlat kotibi Jan-Batist Lemuan ushbu masala bo‘yicha Fransiya hukumati pozitsiyasini ma’lum qildi, — deyiladi kommyunikeda. — Fransiya o‘z-o‘zini respublika deb e’lon qilgan Tog‘li Qorabog‘ni tan olmaydi”.
Fransiya TIV qo‘shimcha qilishicha, Fransiyaning YeXHT Minsk guruhi raisdoshi sifatidagi majburiyati Qorabog‘ nizosini, shu jumladan, Tog‘li Qorabog‘ning bo‘lg‘usi statusi haqidagi masala bo‘yicha muzokaralar yo‘li bilan tartibga solishdan iborat, bu muzokaralarning natijasini esa oldindan va bir tomonlama tartibda aniqlashtirib bo‘lmaydi.
Eslatib o‘tamiz, 25-noyabr kuni Fransiya senatorlari mamlakat hukumatini Tog‘li Qorabog‘ Respublikasini tan olishga chaqiruvchi rezolyutsiya qabul qildi. Fransiya Senati Ozarbayjon qurolli kuchlari va ularning tarafdorlarini 27-sentabrdan beri mintaqada o‘tkazilgan harbiy harakatlar natijasida tortib olingan hududlardan zudlik bilan olib chiqib ketishga chaqirdi. Senat Turkiya hukumati va chet ellik yollanma askarlar ko‘magida amalga oshirilgan Ozarbayjonning harbiy tajovuzini qoraladi.
Armaniston bosh vaziri Nikol Pashinyan ushbu rezolyutsiyani “tarixiy qaror” deb atadi. Uning so‘zlariga ko‘ra, Tog‘li Qorabog‘ni tan olish xalqaro kun tartibiga kiradi. Ozarbayjon prezidentining yordamchisi Hikmet Gadjiyevning aytishicha, mamlakat rasmiylari ushbu qarorga “oddiy qog‘oz varag‘i” kabi qaramoqda.
Fransiyaning Bokudagi elchisi Zakari Gross 26-noyabr kuni Ozarbayjon Tashqi ishlar vazirligiga chaqirildi, unga Fransiya Senati tomonidan 25-noyabr kuni Tog‘li Qorabog‘ bo‘yicha qabul qilingan rezolyutsiya sababli norozilik notasi topshirildi.
10-noyabr kuni Armaniston bosh vaziri Rossiya va Ozarbayjon rahbarlari bilan birgalikda o‘t ochishni to‘xtatish va tinchlikparvar kuchlarni Tog‘li Qorabog‘ga kiritish to‘g‘risida uch tomonlama bitim imzoladi. Armanistonda bu taslim bo‘lish deb qabul qilindi. 11-noyabr kuni Pashinyanning iste’fosini talab qilgan keng miqyosli namoyishlar bo‘lib o‘tdi.
Izoh (0)