Toshkentda ichida yo‘lovchilar bo‘lgan avtobusning simyog‘ochga borib urilishi oqibatida besh kishi jarohat oldi, deb xabar beradi “Toshshahartransxizmat” axborot xizmati.
Ma’lumotlarga ko‘ra, 25-noyabr kuni ertalab soat 07:40 lar atrofida 17T-sonli yo‘nalishda harakatlanayotgan, 18-Avtobus saroyi tasarrufidagi Isuzu yo‘l-transport hodisasiga uchragan. Avtobus Beshqayrag‘och ko‘chasi bo‘ylab, Kichik halqa yo‘li tomon harakatlanish vaqtida Uchtepa tumani 201-uy qarshisida turgan simyog‘ochga kelib urilgan.
YTH oqibatida haydovchi hamda 4 nafar yo‘lovchi tan jarohati olgan, shundan so‘ng darhol barcha jabrlanganlar shifoxonaga yetkazilib, tez tibbiy yordam ko‘rsatilgan.
Mazkur holat yuzasidan “Toshshahartransxizmat”ning Yo‘lovchi transportida harakat xavfsizligini nazorat etish boshqarmasi tomonidan xizmat surishtiruv ishlari o‘tkazilmoqda.
Avvalroq Toshkentda 116-sonli yo‘nalishda harakatlanuvchi avtobus yonib ketgani to‘g‘risida xabar berilgandi.
Izoh (0)