So‘nggi bir hafta ichida (16—23-noyabr) dunyo bo‘yicha 4 millionga yaqin kishi koronavirusga chalindi, deb yozadi “RBK” Jahon sog‘liqni saqlash tashkilotining haftalik hisobotiga tayanib.
Shu tariqa, JSST yana kasallanganlar sonining rekord darajada o‘sishini qayd etdi. COVID-19 oqibatida o‘limlar soni ham ortdi — 67 ming kishi. Bir hafta avval JSST 60 ming kishi vafot etganini ma’lum qilgandi.
Tashkilot mutaxassislari ta’kidlashicha, kasallikning tarqalish tezligi pasaygan: kamayishga moyillik Yevropa va Janubi-sharqiy Osiyoda kuzatilmoqda. Shunga qaramay, Yevropa mintaqasi yangi kasallanganlar va vafot etganlarning eng yirik manbasi bo‘lib qolmoqda.
COVID-19’ga chalinish va undan vafot etish holatlarining o‘sishi Shimoliy va Janubiy Amerikada saqlanib qolmoqda. Afrikada yangi kasallanganlar soni nisbatan past, ammo u yerda kasallikni yuqtirganlar va undan vafot etganlar soni eng tez o‘smoqda (bir haftada tegishli ravishda 15 va 30 foizga).
JSST ma’lumotlariga ko‘ra, 24-noyabr holatiga dunyoda 58,9 million kishi koronavirusga chalingan. Kasallikdan 1,39 million kishi vafot etgan. Jons Hopkins universiteti esa 59,7 million bemor va 1,4 million o‘lim haqida ma’lum qilmoqda. Worldometer servisi ma’lumotlari bo‘yicha esa, 60,1 million kishi koronavirusni yuqtirgan, 1,41 million kishi vafot etgan.
Kasallanganlar soni bo‘yicha haftalik rekordlar oktabr oxiridan buyon bir necha marta kuzatildi. Xususan, 26-oktabrdan 1-noyabrgacha 3,3 million, 2-noyabrdan 8-noyabrgacha 3,6 million, 8-noyabrdan 15-noyabrgacha 3,99 million kishida COVID-19 aniqlangan edi.
JSST ma’lum qilishicha, koronavirusdan o‘lim darajasi so‘nggi ikki haftada 18 foizga oshgan. Kasallik oqibatida har 17 soniyada o‘rtacha bir kishi vafot etmoqda.
Avvalroq Jahon sog‘liqni saqlash tashkilotining COVID-19 bo‘yicha maxsus elchisi Devid Nabarro mamlakatlar infeksiyaga qarshi kurash uchun zarur infratuzilmani yaratmasa, Yevropada koronavirus tarqalishining uchinchi to‘lqini ko‘tarilishi mumkinligini ma’lum qilgan edi.
Izoh (0)