Сўнгги бир ҳафта ичида (16—23 ноябрь) дунё бўйича 4 миллионга яқин киши коронавирусга чалинди, деб ёзади «РБК» Жаҳон соғлиқни сақлаш ташкилотининг ҳафталик ҳисоботига таяниб.
Шу тариқа, ЖССТ яна касалланганлар сонининг рекорд даражада ўсишини қайд этди. COVID-19 оқибатида ўлимлар сони ҳам ортди — 67 минг киши. Бир ҳафта аввал ЖССТ 60 минг киши вафот этганини маълум қилганди.
Ташкилот мутахассислари таъкидлашича, касалликнинг тарқалиш тезлиги пасайган: камайишга мойиллик Европа ва Жануби-шарқий Осиёда кузатилмоқда. Шунга қарамай, Европа минтақаси янги касалланганлар ва вафот этганларнинг энг йирик манбаси бўлиб қолмоқда.
COVID-19’га чалиниш ва ундан вафот этиш ҳолатларининг ўсиши Шимолий ва Жанубий Америкада сақланиб қолмоқда. Африкада янги касалланганлар сони нисбатан паст, аммо у ерда касалликни юқтирганлар ва ундан вафот этганлар сони энг тез ўсмоқда (бир ҳафтада тегишли равишда 15 ва 30 фоизга).
ЖССТ маълумотларига кўра, 24 ноябрь ҳолатига дунёда 58,9 миллион киши коронавирусга чалинган. Касалликдан 1,39 миллион киши вафот этган. Жонс Ҳопкинс университети эса 59,7 миллион бемор ва 1,4 миллион ўлим ҳақида маълум қилмоқда. Worldometer сервиси маълумотлари бўйича эса, 60,1 миллион киши коронавирусни юқтирган, 1,41 миллион киши вафот этган.
Касалланганлар сони бўйича ҳафталик рекордлар октябрь охиридан буён бир неча марта кузатилди. Хусусан, 26 октябрдан 1 ноябргача 3,3 миллион, 2 ноябрдан 8 ноябргача 3,6 миллион, 8 ноябрдан 15 ноябргача 3,99 миллион кишида COVID-19 аниқланган эди.
ЖССТ маълум қилишича, коронавирусдан ўлим даражаси сўнгги икки ҳафтада 18 фоизга ошган. Касаллик оқибатида ҳар 17 сонияда ўртача бир киши вафот этмоқда.
Аввалроқ Жаҳон соғлиқни сақлаш ташкилотининг COVID-19 бўйича махсус элчиси Дэвид Набарро мамлакатлар инфекцияга қарши кураш учун зарур инфратузилмани яратмаса, Европада коронавирус тарқалишининг учинчи тўлқини кўтарилиши мумкинлигини маълум қилган эди.
Изоҳ (0)