Yuzga yaqin iste’molchi 19-oktabr kuni Zangiota tumani elektr ta’minoti korxonasi oldida to‘plandi. Bunga korxonaning aholini ogohlantirmasdan elektr tarmog‘idan uzib qo‘ygani sabab bo‘lgan, deya xabar qilmoqda “Kun.uz”.

Foto: “Kun.uz”

Zangiotalik Rahimjon Mirzayev ishlatilgan elektr energiyasi uchun to‘lovlarni dastlab eski hisoblagich ko‘rsatkichlari bo‘yicha, so‘ngra yangisi bo‘yicha to‘laganini, shundan keyin ham korxona uni 507 ming so‘mga qarzdor qilib qo‘yayotganini aytmoqda.

U 17-oktabr kuni xonadoni elektr tarmog‘idan uzilgani, yo‘q joydan chiqib kelgan qarzlarni to‘lash uchun navbatda turganini ta’kidlaydi.

“26-iyunda ishlatilgan elektr energiyasi uchun 700 ming so‘m naqd to‘laganman. Undan oldingi to‘lov esa 1 million 35 ming so‘m bo‘lgan. 5-avgustda hisoblagichlarimiz almashtirildi. Kecha O‘zgarishdagi kassaga borsam, elektrdan 704 ming so‘m qarzingiz bor ekan, deb aytishyapti.

Ma’lum bo‘lishicha, bizdan 700 ming so‘m naqd pul olgan MIB inspektori hisobimizga 70 ming so‘m o‘tkazgan. Bu bizning aybimiz emas-ku. Inspektorning aybi bilan yuzaga kelyapti qarzdorlik, men o‘z vaqtida to‘laganman. Birovlarning aybi uchun uch kundan beri ‘svet’siz o‘tiribmiz.

MIB inspektorini topib telefonda gaplashdim. Yoningizdan 700 ming so‘m to‘lab turing, haftaning oxirida sizga bankdan yechib olib borib beraman, deydi. Elektr tarmoqlari korxonasi mas’ullari MIBdagilarni aybdor qilib ko‘rsatishyapti”, – deydi Baxtiyor Abdullayev.

Baxtiyor Abdullayev

Foto: “Kun.uz”

Ma’mura Hayitova ikki nafar nogiron qarindoshining nomidan vakil bo‘lib kelganini, ular to‘lovlarni oyma-oy to‘lab borishgan bo‘lsa-da, qarzdor bo‘lib chiqishayotganini aytadi.

Ma’mura Hayitova

Foto: “Kun.uz”

“Nogiron qarindoshlarimning nomidan vakil bo‘lib keldim. Ular gapirolmaydi, hozir ‘svet’siz o‘tirishibdi. To‘lovlarni vaqtida to‘lashgan. Barcha to‘lov kvitansiyalarini ko‘rsatib, mas’ullar qarzimiz borligi, to‘laganimizdan keyin elektrni yoqib berishlarini aytishdi.

Avvaliga 300 ming qarzimiz borligini aytishdi, uni to‘lasak yana 300 ming qarzsizlar, deyishdi. Noiloj uni ham to‘ladik. Hozirgacha oshiqchasi bilan 700 ming so‘m to‘lab qo‘ydik. To‘lovni qilgandan so‘ng SMS xabar jo‘natinglar, ‘svet’ yonadi deyishdi. Lekin aytgan raqamiga SMS xabar umuman ketmayapti”, – deydi u.

Foto: “Kun.uz”

Boshqa bir iste’molchi Sayyora Turopova ham yangi hisoblagich o‘rnatilgani ortidan kelib chiqqan ovoragarchiliklardan shikoyat qildi.

“Elektr tarmoqlari korxonasiga kelib eshikni taqillatsak, hech kim ochmaydi. Nega ochishmaydi? Ikkita qari kampirning mazasi qochib qoldi. Suv sepib, o‘ziga keltirdik. Nima zarur ularga ham? Bunday bo‘ladigan bo‘lsa, eski o‘lchagichlarni joyiga qo‘ysin. O‘sha bilan to‘lanaveradi. Nima qiladi xalqni qiynab? Bu yerda to‘lov qilganlarni ham ‘svet’i haligacha yonmagan”, – deydi Turopova.

Zangiota tumani elektr ta’minoti korxonasi boshlig‘i Ibrohim Nig‘manov yuzaga kelgan tushunmovchilikka ishlatilgan elektr energiyasi to‘lovlari o‘z vaqtida to‘lanmagani sabab bo‘lganini bildirdi.

Uning aytishicha, Zangiota tumanidagi iste’molchilar elektr energiyasi nazorati va hisobi avtomatlashtirilgan tizimga (ASKUE) o‘tkazilgan bo‘lib, iste’mol qilingan elektr energiya uchun qarzdorlar masofadan avtomatik tarzda elektr ta’minotidan uzib qo‘yilmoqda.

Zangiota tumani elektr ta’minoti korxonasi boshlig‘i Ibrohim Nig‘manov

Foto: “Kun.uz”

“3 yil davomida elektr tarmoqlari korxonasi xodimlari odamlarning uylariga bormagan. MIB inspektorlari uyma-uy yurib, qarzlarni undirgan. Bugungi kunda tumandagi barcha elektr hisoblagichlar yangisiga almashtirilyapti. Ushbu jarayonda ayrim inspektorlar aholidan pulni olgan bo‘lsa-da, kassaga kirim qilmagani ko‘rinib qolyapti.

Qaysidir tashkilot fuqarodan to‘lovlarni olgan bo‘lsa-yu, uni iste’molchining hisobiga kirim qilmagan bo‘lsa, bu bizning aybimiz emas-ku. Shu paytgacha qarzlarni MIB undirgan, biz tuman elektr tarmoqlari korxonasimiz. Bizda nima ayb, pul bazaga kelib tushmagan bo‘lsa, bu onlayn tarzda qarzdorlarni o‘chirsa, elektr ta’minoti korxonasining aybi nimada? Bu masala bizga bog‘liq bo‘lganda, xodimlarimiz shu ishni qilganda masala hal bo‘lardi.

Bundan tashqari, hisob raqamlarning noto‘g‘ri yozilishi yoki u pul boshqa yoqqa tushishi hisobiga ham qarzdorlik yuzaga kelayotgan holatlar ham bor. Bazamizda iste’molchilar qarzdor deb sanalgani sababli xonadonlar elektr tarmog‘idan uzilmoqda. Qarzi bo‘lmaganlarni uzayotganimiz yo‘q.

Qolaversa, bu jarayonga inson omili aralashmagan, yangi hisoblagichlar avtomatlashtirilgan bo‘lib, baza avtomatik tarzda qarzdorlarni uzyapti”, – deydi Ibrohim Nig‘manov.

Foto: “Kun.uz”

Tuman elektr korxonasi boshlig‘i aholi nima uchun avvaldan ogohlantirilmaganiga ham izoh berdi.

“Iste’molchini ogohlantirmasdan uning xonadonini tarmoqdan uzib qo‘yishga haqimiz bormi? Aholi xonadonlaridagi elektr hisoblagichlarni yangisiga almashtirib, dasturga kirityapmiz. O‘sha paytda qarzdor bo‘lgan fuqarolar qarzini to‘lab, bazaga telefon raqamlarini kiritib qo‘yishlari kerak edi. Yuqorida aytilganidek, bu ishlarni dastur amalga oshirmoqda. Telefon raqamingiz kiritilsa, uch kun oldin ogohlantirish haqida xabar boradi.

Zangiota tumanida 50 mingta iste’molchi bor. Endi 1200 ta xonadon qarzdorlik sabab o‘chirildi. Shu tarzda qarzga kirgan iste’molchilar tarmoqdan uzib borilaveradi. Lekin hisobida puli bo‘lgan abonent o‘chayotgani yo‘q”, – deya ta’kidladi Zangiota tumani elektr tarmoqlari korxonasi boshlig‘i.

Qayd etilishicha, ijtimoiy tarmoqlar va Telegram’dagi kanallarda 17-oktabr kuni Zangiota tuman elektr ta’minoti korxonasi iste’molchilarni ogohlantirmasdan tarmoqdan uzib qo‘yayotgani, elektron xizmatlar yordamida qarz to‘langandan keyin ham muammo hal bo‘lmayotgani, natijada TETK oldida tumonat olomon yig‘ilgani haqida xabarlar tarqalgan edi.

“Toshkent HETK” AJ yuzaga kelgan holatga munosabat bildirib, tumandagi iste’molchilar elektr energiyasi nazorati va hisobi avtomatlashtirilgan tizimga o‘tkazilgani, hozirgi kunga kelib, qarzdorligi mavjud iste’molchilar tarmoqdan uzib qo‘yilayotgani, to‘lovlar to‘langandan so‘ng ma’lum vaqt ichida elektr energiyasi ta’minoti yana qayta tiklanayotganini ma’lum qilgan.

Avvalroq Toshkent viloyatidagi Zangiota yuqumli kasalliklar shifoxonasida elektr ta’minoti uzilib qolib, bemorlar vafot etgani haqida xabarlar tarqalgandi. Keyinroq SSV va “Hududiy elektr tarmoqlari” bu xabarni rad etgan.