20-noyabr kuni Toshkent shahrida O‘zbekiston Respublikasi Oliy Majlisi Senatining to‘qqizinchi yalpi majlisi o‘z ishini boshladi. Uni Senat raisi Tanzila Norboyeva olib bormoqda. Senatning ijtimoiy tarmoqlardagi sahifalari hamda UzReport telekanali orqali onlayn kuzatib borish mumkin.
Majlisda 77 nafar senator, Vazirlar Mahkamasi a’zolari, davlat tashkilotlari vakillari ishtirok etayotgani bildirildi.
Videokonferensaloqa tarzida o‘tkazilayotgan majlisda bir qator masalalar ko‘rib chiqilmoqda.
Xususan:- “Genom bo‘yicha davlat ro‘yxatiga olish to‘g‘risida”gi;
- “O‘zbekiston kasaba uyushmalari kunini belgilash to‘g‘risida”gi;
- “O‘zbekiston Respublikasida xizmat ko‘rsatgan geolog” faxriy unvonini ta’sis etish to‘g‘risida”gi O‘zbekiston Respublikasi Qonuni haqida.
- “Mulkdorlar huquqlari va qonuniy manfaatlarining kafolatlari yana-da kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi;
- “Koronavirus pandemiyasi va global inqiroz holatlarining iqtisodiyot tarmoqlariga salbiy ta’sirini yumshatish bo‘yicha chora-tadbirlar qabul qilinganligi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi;
- “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunlar shular jumlasidandir.
Bundan tashqari, mamlakat maxsus iqtisodiy zonalarining raqobatbardoshligini oshirish bo‘yicha qabul qilinayotgan choralar, nikohlanuvchi yoshlarni tibbiy ko‘rikdan o‘tkazish samaradorligini oshirish, mamlakatda toshqinlar, sel oqimlari, ko‘chki xavfi mavjud tog‘ va tog‘oldi hududlarida joylashgan aholi punktlari va iqtisodiy obyektlar xavfsizligini ta’minlashga oid qonun hujjatlarining ijro etilishi holati yuzasidan Vazirlar Mahkamasiga parlament so‘rovlari yuborish to‘g‘risidagi masalalar muhokama qilinishi rejalashtirilgan.
Shuningdek, Rossiyada mehnat faoliyatini vaqtincha amalga oshirayotgan O‘zbekiston fuqarolari huquqlari himoyasini ta’minlash chora-tadbirlari to‘g‘risida, bog‘dorchilik-uzumchilik shirkatlari faoliyatining amaldagi holati va ularning tashkiliy-huquqiy asoslarini takomillashtirish masalalari yuzasidan, mamlakatda aholi, ayniqsa, yoshlarni jismoniy tarbiya va sport bilan shug‘ullanishga keng jalb etishda yuzaga kelayotgan muammolar to‘g‘risida, xotin-qizlar tadbirkorligini rivojlantirish uchun yaratilgan shart-sharoitlar yuzasidan, chiqindilar bilan bog‘liq masalalarda vujudga kelgan muammolar va ularning aholi salomatligiga ta’siri yuzasidan Vazirlar Mahkamasiga yuborilgan parlament so‘rovlari natijalari ham muhokama qilinishi nazarda tutilgan.
Yalpi majlis o‘z ishini kun tartibidan o‘rin olgan yettinchi va sakkizinchi masalalarni ko‘rib chiqishdan boshladi. Unda dastlab Vazirlar Mahkamasining 2020-yilning to‘qqiz oyi davomida Harakatlar strategiyasini “Ilm, ma’rifat va raqamli iqtisodiyotni rivojlantirish yili”da amalga oshirishga oid davlat dasturi bajarilishining borishi to‘g‘risidagi hisoboti tinglandi. Hisobotni Iqtisodiy taraqqiyot va kambag‘allikni qisqartirish vaziri Jamshid Qo‘chqorov o‘qib eshittirdi.
Keyingi, sakkizinchi masalada “Davlat hokimiyati va boshqaruvi organlari faoliyatining ochiqligi to‘g‘risida”gi O‘zbekiston Respublikasi Qonunining vazirlik, idoralar hamda mahalliy hokimiyat organlari tomonidan ijro etilishi ko‘rib chiqiladi.
Izoh (0)