Qo‘qonda yog‘och, shakar, shirinliklar savdosi bilan shug‘ullanadigan tadbirkor I.I.ga nisbatan sodir etilgan o‘g‘irlik jinoyatida tadbirkorning o‘z xotini, Z.I., uning haydovchisi O.I., xotinining dugonasi va dugonasining turmush o‘rtog‘i A.D. va R.U. hamda Qo‘qon shahrida mashhur bo‘lgan folbin M.A.ga nisbatan jinoyat ishi ochilgani haqida xabar berilgandi.
Tekshiruvlar natijasida yirik o‘g‘rilikda qatnashganlarning biri Farg‘ona viloyati fuqarolik ishlari bo‘yicha tumanlararo sudi sudyasining (ayol) o‘g‘li ekanligi aniqlandi.
“Xabar.uz”ning ma’lum qilishicha, sudyaning o‘g‘li unga 1500 AQSh dollarga sotib olingan ayollar paltosini sovg‘a qilgan. Ko‘p o‘tmay, o‘g‘il qo‘qonlik oilaviy tadbirkorning ayoli bilan jinoiy til biriktirgan holda o‘sha xonadondan 680 ming AQSh dollari o‘g‘irlagani oshkor bo‘lib, qamoqqa olinadi.
Dastlabki tergov jarayonida o‘g‘irlangan pullarga sotib olingan palto, qator mulklar va moddiy qiymatliklar aniqlanadi.
Jinoiy yo‘l bilan orttirilgani aniqlangan mulk va boshqa moddiy qiymatliklar sud hukmiga binoan Majburiy ijro byurosining Farg‘ona shahar bo‘limi tomonidan sotilib, tushgan pullar zararni qoplashga yo‘naltiriladi.
Farg‘onadagi “Kontinent imkon baho” MChJ mutaxassislari paltoga uch juft taqinchoqlarni (ular ham o‘g‘irlangan pulga sotib olingan) qo‘shib hisoblab, umumiy 2 100 000 so‘m narx chiqargan.
Avvalroq Buxoroda qo‘shnisining uyidan qiymati 8,5 million so‘mlik buyumlarni o‘g‘irlagan 17 yoshli qiz qo‘lga olingani hamda fuqarolarning salkam 500 million so‘mlik qoramollarini aldov yo‘li bilan qo‘lga kiritib, sotib yuborgan shaxs ushlangani haqida xabar berilgandi.
Izoh (0)