Mirzo Ulug‘bek nomidagi O‘zbekiston Milliy universitetida Gidrometeorologiya fakulteti tashkil etiladi, deb xabar bermoqda Oliy va o‘rta maxsus ta’lim vazirligi matbuot xizmati.
Qayd etilishicha, bu haqda “O‘zbekiston Respublikasi gidrometeorologiya xizmati faoliyatini yanada takomillashtirish chora-tadbirlari to‘g‘risida”gi Prezident qarorida belgilandi.
Qarorga muvofiq, universitetda yangi fakultet 2021/2022-o‘quv yilidan boshlab tashkil etiladi.
Shuningdek, qarorda 2021/2022-o‘quv yilidan boshlab Rossiya davlat gidrometeorologiya universiteti va boshqa xorijiy ta’lim muassasalari bilan hamkorlikda qo‘shma ta’lim dasturlari bo‘yicha gidrometeorologiya yo‘nalishida kadrlar tayyorlashni tashkil etish belgilangan.
Toshkent gidrometeorologiya kolleji negizida Toshkent gidrometeorologiya texnikumi tashkil etiladi va bu yerda gidrometeorologiya sohasida o‘rta bo‘g‘in mutaxassislari tayyorlanadi.
Texnikumda kadrlar tayyorlash davlat buyurtmasi va to‘lov-shartnoma asosida amalga oshiriladi.
Eslatib o‘tamiz, noyabr oyining boshlarida O‘zbekiston Gidrometeorologiya xizmati samarali faoliyat yuritish uchun xodimlarning oylik maoshlari kamligi va malakali kadrlar ketib qolishi kabi masalalarni zudlik bilan hal etish lozimligini ma’lum qilgandi. Shu kuni Prezident Shavkat Mirziyoyev mamlakatda gidrometeorologiya xizmati faoliyatini takomillashtirish bo‘yicha ustuvor vazifalar muhokamasi yuzasidan yig‘ilish o‘tkazgandi.
Izoh (0)