Rossiyaliklar farovon hayotning asosiy mezonini aytdi

Mustahkam sog‘liq va sifatli tibbiy xizmati — farovon, qulay hayotning asosiy ko‘satkichidir. “RBK”ning yozishicha, oktabr oyida o‘tkazilgan so‘rovnoma natijalariga ko‘ra Rossiya aholisining yarmidan ko‘pi shunday fikrda.

Tadqiqot “Rosgosstrax jizn” kompaniyasi va “Otkritiye” banki tomonidan telefon orqali so‘rov usulida o‘tkazilgan. Unda barcha federal okruglardan 1503 nafar kishi, shu jumladan, 48 foiz erkak, 52 foiz ayol qatnashgan. Ularning 26,1 foizini 18-29 yosh, 28,7 foizini 30-49 yosh, 14,6 foizini 50-59 yosh va 30,5 foizini 60 va undan katta yoshdagi fuqarolar tashkil etgan.

Ishtirokchilarga o‘z hayotlarini farovon deb hisoblaydilarmi va bunday hayotning asosiy ko‘rsatkichi aynan nimada, degan savolga javob berish so‘ralgan. Respondentlarning 70, 4 foizi yaxshi tibbiy xizmat va sog‘liq deb javob bergan, 41,6 foizi — yuqori daromad, 31,7 foizi — o‘z uy-joyiga ega bo‘lishni farovon turmush belgisi deb aytgan.

Shuningdek, ishtirokchilarning 18 foizi asosiy mezon sifatida sayohat qilish imkoniyatini, 17,3 foizi davlatning yuqori darajada ijtimoiy qo‘llab-quvvatlashini, ya’ni imtiyozlar, soliq chegirmalarini ko‘rsatgan.

Farovon hayot belgisi sifatida sevimli ish yoki biznes (14,7 foiz), hech qayerda ishlamay passiv daromadga ega bo‘lish (4,4 foiz), shaxsiy avtomobilning borligi (4,2 foiz) ham qayd etilgan. Ishtirokchilarning 0,4 foizi poytaxtda yoki boshqa biror yirik shaharda yashashni farovon hayot belgisi sifatida ko‘rishini bildirgan.

Shu bilan birga, farovon hayotning qanday belgisiga egasiz degan savolga rossiyaliklarning aksariyati avtomobili borligini aytgan (67,1 foiz).

So‘rovnoma ishtirokchilarining yarmida ko‘pi (54,7 foizi) o‘z hayoti sifatidan mamnun yoki deyarli qoniqadi. Erkaklarnikiga qaraganda (52,6 foiz) ko‘proq ayollar (56,8) bundan mamnunligini bildirgan. Yoshlar (18-29 yosh) 30 yoshdan 49 yoshgacha bo‘lgan kattalarga qaraganda o‘z hayotidan ko‘proq qoniqish bildirgan.

Respondentlarning faqat 50 yoshdan 59 yoshgacha bo‘lganlari (51,3 foizi) o‘z hayotlari sharoitidan qoniqmayotganini ma’lum qilgan.