Checheniston rahbari Ramzan Qodirov Kurchaloy shahridagi bolalar o‘yin markazidan Marvel kinoolami va komikslarining qahramonlari tasvirlarini olib tashlashni talab qildi. Bu haqda u yangi turar joy majmuasiga tashrifi vaqtida ma’lum qilgan, deb yozadi “RBK”.
O‘yin markazi devoridagi kapitan Amerika va Torning suratlarini ko‘rgan Qodirov ularni “fantaziya” deb atab, olib tashlashni talab qilgan. “Haqiqiy qahramonlarimizning suratlarini joylashtiring. Dinimiz va xalqimiz tarixida namuna olish mumkin hamda kerak bo‘lgan ko‘plab haqiqiy qahramonlar bor”, — deydi respublika rahbari.
Aholisi 26 mingga yaqin bo‘lgan Kurchaloyga shahar maqomi 2019-yilda berilgan edi. Shahar markazidagi to‘qqizta turar joy binosining qurilishi deyarli yakunlangan. Qodirovning aytishicha, yangi majmua Kurchaloyning ko‘rkiga aylanadi.
Eslatib o‘tamiz, komikslar va ularning qahramonlarini Rossiya sobiq madaniyat vaziri Vladimir Medinskiy ham tanqid qilgandi. 2019-yilda u grafik novellalarni yoqtirmasligini ma’lum qilib, ularni “majruhlik” deb atagandi. Uning so‘zlariga ko‘ra, bu 7-8 yoshli bolalar o‘qishi uchun mo‘ljallangan. “Katta yoshdagi insonning komiks o‘qishi, menimcha, bu majruhlik”, degandi Medinskiy.
Izoh (0)